Almaty zoobaǵynda 30 jylda alǵash ret tapır tóldedi
ALMATY. QazAqparat - Almaty zoobaǵynda úsh janýar tóldedi, dep habarlaıdy QazAqparat tilshisi.
Atap aıtqanda, ala tapır janýary men qosórkeshti túıe, kengýrýdyń sany artty. Onyń ishinde tapırdiń tóldeýi sońǵy ret 80-jyldardyń sońynda tirkelgen.
Tapırdiń atalyǵy - jeti jasar Martın 2013 jyly Kalınıngradtan ákelingen. Analyǵy - tórt jasar Dýnıasha 2017 jyly Novosıbırsk qalasynan jetkizildi.
«Tapır 26 aqpan kúni tańǵy saǵat 7.00-de tóldedi. Enesi men tólin karantın bólimine ornalastyrdyq. Kún jylynǵanda olar ortaq volerge shyǵarylady», - dedi zoobaq fotografy Mıhaıl Sorokoýmov.
Zoobaq kelýshileri endi kishkentaı tapırdi ǵana emes, qos órkeshti túıeniń botasy men kengýrýdiń balasyn da kóretin bolady. Túıe 27 aqpan kúni tóldedi. Janýardyń atalyǵy men analyǵy 11 jasta.
«Qosórkeshti túıeler aıazdy klımatqa jaqsy beıimdelgen. Júk tasýǵa tózimdi. Al nar túıeler shóldi klımatqa, uzaq júriske shydamdy keledi. Onymen qosa, amerıkalyq órkeshsiz túıelerdiń 4 túri bar (lama, alpaka, gýanako men vıkýnıa). Qazaq úshin túıe maly erekshe qasıetti. Túıe - molshylyq pen baılyqtyń belgisi», - deıdi zoobaq ókilderi.
Kengýrý balasy byltyr qarasha aıynda týǵan eken. Biraq zoobaq qyzmetkerleri ol týraly jaqynda bilgen. Onyń sebebi - enesi kengýrýdiń sómkesinde tyǵylyp kelgen.
«Kengýrý balalary embrıon kúıinde týylatyny belgili. Sosyn enesiniń terisimen jorǵalap otyryp, sómkege jetedi. Sonda jetiledi. Jaqynda jas kengýrý sómkeden tumsyǵyn shyǵardy. Ol sómkede áli 7 aı ómir súredi. Degenmen, onyń analyǵy men atalyǵy jazǵy volerge shyǵa beredi»,- dedi Mıhaıl Sorokoýmov.
Qalalyq zoobaq dırektorynyń mindetin atqarýshy Aıgúl Týleeva kelýshilerdiń tapır tólinen basqasyn kóre alatynyn aıtty.
Jańa týǵan tólderge áli esim berilgen joq.
