Almaty zoobaǵynan maımyl qashyp ketpek boldy
ALMATY. QazAqparat - Búgin Almaty haıýanattar baǵynda keleńsiz jaǵdaı boldy. Prımattar bólimindegi Pasha atty shımpanze qysqy qorshaýdan jazǵysyna aýystyrylatyn kezde temir tordy buzyp, volerden syrtqa shyǵyp ketti, dep habarlaıdy QazAqparat tilshisi.
Almaty zoobaǵynyń málimetine sáıkes, óz aýmaǵynan bólektenip qalǵandyqtan, strestik jaǵdaıǵa ushyraǵan shımpanze júgirip kele jatyp, áıel men kishkentaı bala otyrǵan qolarbany qaǵyp jibergen.
«Bala jaraqattandy. Zoobaq feldsheri alǵashqy medıtsınalyq kómek kórsetti. Artynan jedel járdem shaqyryldy. Qazir balanyń densaýlyǵyna qaýip tónip turǵan joq», - dep habarlady zoobaqtyń baspasóz qyzmeti.
Zootehnıkter men veterınarlar jaǵdaıdy rettep, shımpanzeni volerge kirgizdi.
«Haıýanattar baǵynda janýarlardyń qashýy sırek bolatyn jaǵdaı emes. Mundaı oqıǵalardyń sońy qaıǵyly jaǵdaılarǵa ulasyp ta jatady. Mamandardyń jedel qımylynyń arqasynda qıyndyq týyndaǵan joq», - dep atap ótti zoobaq ókilderi.
Zoobaq basshylyǵy men qyzmetkerleri zardap shekken balanyń ata-anasymen únemi baılanysta bolady jáne qajetti medıtsınalyq kómek kórsetýge daıyn.
Buǵan deıin Almaty zoobaǵyndaǵy janýarlar jazǵy volerge kóshirilip jatqany jazylǵan bolatyn.
