Almaty zoobaǵyna «Ońaı» júıesi arqyly kirýge bolady
ALMATY. QazAqparat - Almaty zoobaǵynyń tólem júıesi men «Ońaı» elektrondyq júıesi biriktirildi. Endi kelýshiler zoobaqqa kirý aqysyn «Ońaı» arqyly tólep kire alady, dep habarlaıdy QazAqparat tilshisi.
«Biz tólem júıesin «Ońaı» júıesimen biriktirýdi aıaqtadyq. Endi «Ońaıy» barlarǵa bılet satyp alý mindetti emes. «Ońaıy» barlar endi artyq aqsha alyp júrmeı «Medeý» syrǵanaǵyna, Almaty zoobaǵyna kire alady. Jańa termınaldar nysanǵa kireberiste 8 tamyzdan bastap iske qosyldy», - dedi Almaty zoobaǵy dırektorynyń orynbasary Dana Egeýbaeva.
Onyń aıtýynsha, zeınetkerler men múmkindigi shekteýli azamattar «Ońaı» kartasy arqyly tólem jasamaıtyn bolady. Óıtkeni onda jeńildik qarastyrylmaǵan.
«Jasy úlken kisiler men múgedekter kassa arqyly tegin ótetin bolady»,- dedi ol.
Aıta ketý kerek, osyǵan deıin «Ońaı Pay» JShS ókilderi atalǵan júıeni qalada taratýǵa nıetti ekendigin buryn aıtqan bolatyn.
Búginde «Ońaı» kartasy arqyly tek qana qoǵamdyq kólikte ǵana júrip qoımaı, «Medeý» muz aıdynyna, «NEMO» delfınarııine kirýge bolady.
