Almaty zoobaǵyna kelýshiler qara teńbilsherdi kóre alady
ALMATY. QazAqparat - Almaty zoobaǵyna kelýshiler budan bylaı qara teńbilsherdi kóre alady. Bul týraly QazAqparat tilshisine atalmysh haıýanattar baǵynyń baspasóz hatshysy Mıhaıl Sorokoýmov málimdedi.
Onyń aıtýynsha, Vasek degen laqap atqa ıe bul jyrtqysh ań, ońtústik astanaǵa ótken jyldyń qazan aıynda Novosibir qalasynan jetkizilgen eken. Sodan beri ony qyzmetkerlerden basqa eshkim kórmegen.
«Vasek jol júrý barysynda kúızeliske ushyrady. Keıin erejege sáıkes karantınnen ótkizildi. Endi mine aýa-raıy jylyǵan soń, qara teńbilsher ashyq volerge shyǵaryldy», - dedi M. Sorokýmov.
Aıta ketelik, osymen Almaty zoobaǵyndaǵy teńbilsherlerdiń sany úshke jetti. Vasek jáne kádimgi shubar tústi eki urǵashy teńbilsher.
Teńbilsher, ıaǵnı ıagýar - mysyq tuqymdastar ishindegi iri janýarlar, ıaǵnı pantera túrine jatatyn sút qorekti jyrtqysh ań. Denesiniń iriligi jóninen arystan, jolbarys jáne leopardtan keıin tórtinshi orynǵa ıe. Gýaranı tilinde ıagýar «bir sekirgennen óltiretin jyrtqysh» degen maǵynany bildiredi.
Sonymen qatar, ol basqa jyrtqyshtarǵa qaraǵanda jemtiginiń kózine tesile qarap, ony esinen tandyra alatyn erekshe qasıetke de ıe.
