Almaty zoobaǵyna ekzotıkalyq janýar ákelindi
ALMATY. QazAqparat - Almaty zoobaǵyna Habarovsk zoobaǵynan sútqorektilerdiń jańa túri ákelindi, dep habarlaıdy QazAqparat tilshisi.
Almaty zoobaǵy ashylǵaly beri 80 jylda tuńǵysh ret kúzen tuqymdas erekshe sútqorekti - harza ákelindi.
Janýar 2018 jyldyń shildesinde Habarovsk qalasyndaǵy zoobaqtan jetkizildi.
Sútqorekti qazir jańa mekenine úırenisip jatyr.
Harzá - keýdesi jıren tústi kúzen, jyrtqyshtar tobyna jatady.
Olardyń denesiniń uzyndyǵy 55-80 sm, quıryǵy 35-44 sm, salmaǵy 5,7 keli shamasynda bolady.
Barlyq kúzen tuqymdastar sııaqty harzalardyń da keýde bulshyqetteri myqty qalyptasqan.
Sonymen qatar, Almaty zoobaǵyna Chehııadan tórt lemýr jetkizildi.
Alǵashqy eki lemýr kóktemde Frantsııa zoobaǵynan ákelingen bolatyn. Janýarlar jańa klımattyq ahýalǵa beıimdelip keledi.
