Almaty zoobaǵyna aq keýdeli týkandardyń juby ákelindi

ALMATY. QazAqparat – Almaty zoobaǵy aq keýdeli týkandardyń jubymen tolyqty, dep habarlaıdy QazAqparat tilshisi.

Almaty zoobaǵyna ákelingen aq keýdeli týkandardyń vıdeosy zoobaqtyń Instagram paraqshasynda jarııalandy.

«Olar Armenııa astanasy - Erevan qalasynan ákelindi. Olar áli kishkentaı, eki jasta. Qazir olar akvarıým janyndaǵy Qustar úıinde turady. Toqyldaq tárizdiler klasyna jatatyn, tumsyǵy múıizge uqsas bul qustardyń otany – Ońtústik Amerıka ormandary»,- dep habarlady zoobaq ókilderi.

Sondaı-aq zoobaqta týkandardyń volerge tez úırenip, ózderin kútýshi kıperlermen dostasyp, kópshiliktiń súıikti qusyna aınalǵanyn habarlady.

Olar banan, apelsın sııaqty jemistermen qatar, tyshqan, qus jumyrtqalarymen qorektenedi. Týkandar 20 jyl ómir súredi. Aq keýdeli týkan Halyqaralyq tabıǵat qorǵaý odaǵynyń Qyzyl kitabyna engizilgen.

Foto: www.instagram.com/almatyzoo