Almaty zoobaǵy jıraftyń ólimine qatysty túsinik berdi
ALMATY. QazAqparat - Almaty haıýanattar baǵynda eki jastaǵy Melman esimdi jıraf mert boldy.
Zoobaq baspasóz hatshysy Tohtar Álıevtiń aıtýynsha, jıraf keshe, 5 qazanda ólgen.
«Jıraftyń densaýlyǵy jaqsy bolatyn. Keshe 15:00-de júgirip júrgen. Jarty saǵattan keıin qulap tústi de, ólip ketti», - dedi ol.
Jırafqa kesel neden kelgeni áli tolyq zerttelgen joq. T.Álıevtiń aıtýynsha, janýardyń óleksesi saraptamaǵa jiberilgen. 10 jumys kúni ishinde tolyq nátıjesi belgili bolady.
«Melman bizdiń zoobaqta týyp, jetilgen. Ol 2000 jyly Almaty haıýanattar baǵyna ákelingen jıraftyń tóli edi. Zoobaq jumysshylary da áli eshteńe túsiner emes», - deıdi T.Álıev.
Eske sala keteıik, Almaty zoobaǵynda mamyr aıynda «Quralaı» atty jolbarys ókpe dertinen ólgen bolatyn.
