Almaty zoobaǵy janýarlardy kelýshilerden qorǵaýǵa kiristi
ALMATY. QazAqparat - Almaty zoobaǵy aıýlardy qaýipti kelýshilerden qorǵaýǵa kiristi, dep habarlaıdy QazAqparat tilshisi.
Mekemeniń baspasóz qyzmeti habarlaǵandaı, kelýshilerdiń ishinde janýarlarǵa zııan keltiretinderi de kezdesedi.«Ótkende bir er adam gımalaı aıýyna tas laqtyrǵan. Osylaı ol aıýdyń nazaryn aýdarýǵa tyrysqan. Janýarlarǵa jeýge bolaıtyn ónimder beretinder bar. Kelýshilerdiń úlken de, kishisi de olarǵa popkorn, júgeri, chıpsy, kámpıt, alma berýge qumar. Olar ketken soń qyzmetkerler tordyń ishinen túrli qoqys shyǵarady», - dedi baspasóz qyzmetinen.
Mamandardyń aıtýynsha, osyndaı kelýshilerdiń áreketinen qorǵaý úshin endi qońyr aıýlardyń voleri áınek jabyndymen qorshalatyn bolady.
«Qurylys jumystary búgin-erteń bastalǵaly otyr. Materıaldar túgel ákelindi. Sonymen qatar, amýr jolbarystaryna da jańa jaı salynady. Osyndaı jumystardyń arqasynda janýarlardyń qaýipsizdigin arttyra túsemiz», - dedi baspasóz qyzmetinen.
Zoobaq mamandarynyń aıtýynsha, kelýshilerdiń kóp bolýyna baılanysty olardyń bárin tekserý múmkin emes. Alaıda, mas kúıinde kelgen adamdar kirgizilmeıdi.
Aıta ketý kerek, zoobaq dırektory Erjan Erkinbaev Instagramda jasy úlken er adamnyń qara aıýǵa tas laqtyrǵanyn jazǵan bolatyn.
Jazba ǵalamtor qoldanýshylary arasynda úlken narazylyq týdyrdy. Pikir bildirýshilerdiń biri «úlken kisini volerge aıýmen birge qamap qoıý kerek» dese, keıbireýler aıyppul salýdy usyndy.
Al zoobaq basshylyǵy ol kisini jazalaýǵa qatysty eshqandaı pikir bildirmedi.
Osyǵan uqsas jaǵdaı 2015 jyly bolǵan edi. Eki bozbala pnevmatıkalyq qarýdan úırekterdi atyp jatqan jerinen ustaldy.
Sondaı-aq, osydan birneshe jyl buryn ólgen qoltyraýynnyń ishinen veterınarlar plastık qutylar, kámpıt, qaǵaz taýyp alǵan. «Onyń ólimine osy sebep bolýy da ǵajap emes», deıdi mamandar.
