Almaty zoobaǵy taǵy bir ańmen tolyqty
ALMATY. QazAqparat - Almatynyń haıýanattar baǵyn mekendeýshi janýarlardyń qatary tolyǵyp jatyr, dep habarlaıdy QazAqparat.
Almaty zoobaǵyna mamandar Qaraǵandy haıýanattar baǵynan taý arystanynyń (pýma) kúshigin alyp keldi.
«Zoobaqtar arasynda juptaryn tolyqtyrý nemese artyq ańdy basqaǵa aıyrbastaý sekildi ózara janýarlarmen almasatyn tájirıbe bar. Osy tásilmen bizge Qaraǵandy zoobaǵynan 6 aılyq pýmanyń kúshigi ákelinip, bizden olarǵa Batyr atty jolbarys berildi», - dedi Almaty zoobaǵynyń baspasóz qyzmetinen.
Jańadan kelgen janýarǵa Hangıra degen at berilgen. Qazir taý arystanynyń kúshigine jaqsy kútim jasalyp jatyr.
