Almaty zoobaǵy qaıtadan ashyldy
ALMATY. QazAqparat - Koronavırýsqa baılanysty naýryz aıynan beri jumysyn toqtatqan Almatydaǵy zoobaq jumysyn qaıtadan bastaıdy, dep habarlaıdy QazAqparat tilshisi.
«29 tamyzdan bastap uzaq úzilisten keıin haıýanattar baǵy jumysyn qaıta bastaıdy. Qaıta ashylǵan kúnnen bastap adamdar kele bastady. Kelýshilerdi zoobaq aýmaǵyna saqtyq sharalaryn saqtaı otyryp kirgizedi. Maska, qolǵap kııý, áleýmettik qashyqtyqty saqtaý erejeleri áli de óz kúshinde», - deıdi zoobaq qyzmetshisi Mıhaıl Sorokoýmov.
Zoobaqtyń kireberisinde dezınfektsııalaý zattary, antıseptıkter ornalasqan bólme bar, sondaı-aq kelýshilerdiń araqashyqtyǵyn saqtaıtyn belgiler de ornatylǵan.
Eske sala ketsek, Almaty zoobaǵy karantın kezinde onlaın rejımde jumys istedi. Zoobaq qyzmetkerleri áleýmettik jeliler arqyly ondaǵy jan-janýarlar karantın rejıminde qalaı ómir súrip jatqandyǵy týraly aıtyp otyrdy. Bir aıǵa jýyq ýaqyt ishinde zoobaq qyzmetshileri uıymdastyrǵan tikeleı efırdi jarty mıllıonnan astam adam kórgen.
