Almaty zoobaǵy qandaı janýarlarmen tolyqty
ALMATY. QazAqparat - Almaty zoobaǵy sırek kezdesetin janýarlar kollektsııasyn tolyqtyrýǵa basa mán berip keledi, dep habarlaıdy QazAqparat tilshisi.
Zoobaq basshylyǵy qatary sırep qalǵan mysyq tuqymdas jyrtqyshtardyń ornyn toltyrýǵa nıetti. Atap aıtqanda, zoobaqqa jaqynda arystannyń alany ákelindi.
Osydan birneshe kún buryn zoobaqta Han esimdi 15 jastaǵy arystan ólgen bolatyn. Qan obyry dertine shaldyqqan janýar narkozdan oıanbaı qaldy.
«Bizge jańa janýar ákelindi. Ars esimdi arystannyń alany Bishkekten ákelindi. Osy ǵajap janýardy kórýge asyǵyńyzdar», - dedi zoobaq dırektory Erjan Erkinbaev Instagrammdy paraqshasynda.
Sonymen qatar, 1 apta buryn ekzotıkalyq qustar ekspozıtsııasy Ara men Irbıs esimdi totyqustarmen tolyqty. Qazir zoobaq basshylyǵy ekspozıtsııany bezendirýmen aınalysyp jatyr.
Jaqynda zoobaqty jergilikti turǵyndarǵa belgisiz tapır janýary tolyqtyrdy. Ońtústik Amerıkanyń tropıkalyq ormandarynda tirshilik etetin sırek janýarlardyń juby Reseıden ákelingen.
Al 2 apta buryn prımattardyń qataryna kishkentaı maımyldar qosyldy. Sonymen qatar, qalalyq máslıhat 2018 jyldyń bıýdjetin bekitý kezinde ekzotarıýmdy qaıta jańǵyrtýǵa qarjy bóldi.
Aıta ketý kerek, osydan birneshe aı buryn Almaty zoobaǵy arystannyń naýqas alanyn jekemenshikten satyp alǵan bolatyn.
Álı esimdi janýardy burynǵy qojaıyndary fotosessııa úshin paıdalanyp kelgen.
