Almaty zoobaǵy aýmaǵyndaǵy dóner dúńgirshekteri azaıtylady
ALMATY. QazAqparat - Almaty zoobaǵynda arzanqol oıynshyqtar men qaptaǵan dóner dúńgirshekter sany azaıady. Bul týraly máslıhat depýtaty Erjan Erkinbaev Instagramdaǵy paraqshasynda jazdy, dep habarlaıdy QazAqparat tilshisi.
Onyń aıtýynsha, Almaty ákimi Baýyrjan Baıbek zoobaq aýmaǵyndaǵy nysandardyń biryńǵaı stılin qalyptastyrý týraly bastamany qoldady.
«Zoobaq aýmaǵyndaǵy 30 dúńgirshektiń sanyn 10-ǵa deıin qysqartý jáne biryńǵaı stıl qalyptastyrý týraly bastamamyzdy qala ákimi qoldady. Zoobaqta nysandar biryńǵaı ári fýnktsıonaldy bolýy tıis. Biz jalǵa alý aqysyn tómendetýge daıynbyz», - dedi Erjan Erkinbaev.
Aıta ketý kerek, Almaty zoobaǵynda sońǵy 2 jylda úlken ózgerister jasaldy.
Atap aıtqanda, janýarlar ornalastyrylǵan torlar yńǵaıly volerlerge aýystyryldy. Ótken aıda ekzotarıým bóligi tolyǵymen qaıta jasaldy. Sonymen qatar, janýarlar baǵyna alǵash ret akýla tuqymdastar men medýzalar jetkizildi.
Foto: instagram.com/yerkinbayev
