Almaty zoobaǵy alpakanyń júnin qyrqatyn grýmer izdep jatyr
ALMATY. QazAqparat – Almaty zoobaǵy túıetuqymdas janýar – Shokoladka esimdi alpakanyń júnin qyrqatyn maman izdep jatyr, dep habarlaıdy QazAqparat tilshisi.
Almaty zoobaǵynyń málimetinshe, janýarlardyń júni túsip, túr-tústeri kútimsiz bolyp kórinýi qalypty tabıǵı jaǵdaı. Baqtaǵy qasqyr, túlki, aıý, buǵy men túıeler – barlyǵy da osy kezde túleıdi. Leopardtar men ponılar jáne Prjevalsk jylqylarynyń júnderi juqa bolǵandyqtan olardyń terisiniń túlegeni asa bilinbeıdi. Maýsym aıynyń ortasynda olardyń túleýi toqtaıdy.
«Zoobaǵymyzǵa kelýshilerdiń kóbi janýarlardyń kútimi joq, júnderi túsip, qaraýsyz júr dep oılaıdy. Shyndyǵynda janýarlarymyzdyń densaýlyǵy da, kútimi de jaqsy. Olardyń júni túsip, túr-tústeri kútimsiz bolyp kórinýi – qalypty tabıǵı jaǵdaı. Janýarlar kóktemde túleıdi»,- dep atap ótti Zoobaq ákimshiligi.
Qazir zoobaq túıetuqymdas janýar – Shokoladka esimdi alpakanyń júnin qyrqatyn grýmer izdep jatyr.
«Zoobaq qyzmetkerleriniń arasynda arnaıy grýmer (janýardyń teri, júnin qalypqa keltiretin maman) joq. Sondyqtan alpakaǵa shashtaraz izdeımiz. Aralaryńyzda «janýarlardyń shashtarazy» bolyp, osy jumysty qoryqpaı atqara alatyndaryńyz bar ma? Bálkim bizdiń alpakanyń júnin ózgeshe, zamanaýı túrde erekshe retke keltirip bere alasyz? Alpakaǵa grýmer bolyp beretinderdi zoobaqta kútemiz», - delingen zoobaqtyń Instagram-daǵy habarlamasynda.
Aıta keteıik, Almaty zoobaǵyna lamatuqymdas erekshe janýar byltyr Reseıdiń Krasnodarsk haıýanattar baǵynan jetkizilgen.
