Almaty zııandy tútin shyǵaratyn avtobýstardan birjola qutylmaq
ALMATY. QazAqparat - Almaty qalalyq kólik basqarmasynyń basshysy Maqsut Isahov qaladaǵy zııandy tútin shyǵaratyn avtobýstardyń qashan joıylatyndyǵyn aıtyp berdi, dep habarlaıdy QazAqparat tilshisi.
Maqsut Isahovtyń málimdeýinshe, tasymaldaýshy kompanııa jańa avtobýs satyp alyp jatyr.
«Jyl sońyna deıin jańa avtobýstar jetkiziledi. Ákimdik kommýnaldy avtoparkterge 300 avtobýs satyp alyp jatyr. «Gazel» men «Lıaz» markasynyń avtobýstary qalanyń ortalyǵy men shetki aýdandaryn baılanystyratyn marshrýttarda jumys jasap keledi. Reseılik Lıaz zaýyty apta saıyn bizge 15 avtobýs jiberip turady. Jekemenshik avtobýs parkteri 254 avtobýs satyp alýǵa kelisimsharttaryn kórsetti. Onyń ishinde 100 avtobýsty «Avto alma trans» satyp alady. Bul kásiporyn №65 marshrýtqa qyzmet etetin. Esterińizde bolsa, kóbine osy marshrýttyń avtobýstary qalanyń ortalyǵynda qoıý tútin býdaqtatyp júredi. Qazannyń ortasynda olarǵa alǵashqy 28 avtobýs jetýi tıis. Bul kólikterdi 65 marshrýtqa qoıýdy talap etetin bolamyz. Eger basqasha bolsa, bul marshrýtty avtoparkten alyp, qalanyń kommýnaldy menshigine aýystyryp, jańa Lıaz avtobýstaryn qoıatyn bolamyz. Oǵan ýáde berem», - dedi Isahov.
«Madına», «BaTý Trevel» kásiporyndary da jańa avtobýs satyp alyp jatyr.
Basqarma basshysy bıyl jyl sońyna deıin jańa avobýstardyń úlesi 53%-dan 70%-ǵa jetetindigin basa aıtty.
«Saralanǵan tarıf engizilgenge deıin tasymaldaýshylar shyǵyn kóp dep narazylyq bildiretin edi. Endi olardyń tabysy 2 esege artty. Jekemenshik tasymaldaýshylardyń jańa avtobýs satyp ala bastaýy «Ońaı» júıesiniń tıimdiligin kórsetse kerek», - dedi ol.
Laýazymdy tulǵa janarmaı baǵasy kóterilse de jol aqysy qymbattamaıtynyn aıtyp sendirdi .
