«Almaty jylý júıesi» qala turǵyndaryna 227 mln teńge qaıtaryp beredi
ALMATY. QazAqparat - Almatyda jylytý maýsymy aıaqtalysymen jylytýaralyq kezeńde 32 shaqyrym jylý jelisi jóndelmek. Bul 2016 jylǵa (11,97 shaqyrym) qaraǵanda 3 ese kóp, dep habarlaıdy QazAqparat tilshisi «Almaty jylý júıesi» JShS baspasóz qyzmetine silteme jasaı otyryp.
Atalǵan kásiporynnyń habarlaýynsha, 2016-2017 jylǵy aıaqtalǵan jylytý maýsymynda jalpy qala boıynsha jeliler 1924 ret zaqymdanǵan. Bul 2015-2016 jylmen salystyrǵanda 7 paıyzǵa az. 2015-2016 jyldary jylytý jelileri 2070 ret zaqymdanǵan.
«Jylytýaralyq kezeńde 32 km jylý jelilerin qaıta qurylymdaý josparlanyp otyr, bul 2016 jylǵa (11,97 km) qaraǵanda 3 ese kóp. 2016-2017 jylǵy jylytý maýsymy úshin qaıta esepteý nátıjeleri boıynsha «Almaty jylý júıesi» JShS Almaty qalasynyń turǵyndaryna 227,418 mln teńgeni qaıtaryp beredi», delingen habarlamada.
Aıta keteıik, atalǵan qarajat qala turǵyndaryna aǵymdaǵy jyldyń 1 shildesine deıin qaıtarylady.
