«Almaty jylý júıeleri» tutynýshylarǵa 49,4 mln teńge qaıtarady

NUR-SULTAN. QazAqparat - «Almaty jylý júıeleri» JShS tutynýshylarǵa artyq eseptelgen 49,4 mln teńgesin qaıtarady, dep habarlaıdy QazAqparat tilshisi.

Tabıǵı monopolııalardy retteý komıtetiniń habarlaýynsha, vedomstvonyń Almaty qalasy boıynsha departamenti syrtqy aýanyń naqty temperatýrasyn eskerip, 2020-2021 jyldardaǵy jylýmen jabdyqtaýdyń qunyn qaıta eseptep, 49,4 mln teńge mólsherinde artyq somany shyǵarǵan. Alaıda, qalaǵa qyzmet kórsetetin «Almaty jylý júıeleri» JShS munymen kelispegen, kerisinshe tutynýshylarǵa shamamen 5 mln teńge kóleminde qosymsha esepteý qajet ekenin habarlady.

«Departament Almaty qalasynyń mamandandyrylǵan aýdanaralyq ekonomıkalyq sotyna «Almaty jylý júıeleri» JShS-yn óz mindetin oryndaýǵa májbúrleý týraly talap-aryzben júgindi. Bıylǵy 26 qańtardaǵy sot sheshimimen talap-aryz tolyq qanaǵattandyryldy. Sonymen qatar JShS osy sot sheshimine appelıatsııa berdi. Biraq Almaty qalalyq soty appelıatsııany qaraýsyz qaldyrdy. Endi «Almaty jylý júıeleri» kúzgi-qysqy kezeńde temperatýralyq rejımdi saqtamaǵany úshin tutynýshylarǵa jylýmen jabdyqtaýdyń qunyn 49,4 mln teńgege qaıta esepteý týraly sheshimdi oryndaýy qajet», - delingen habarlamada.

Seriktestik aldaǵy mamyr aıynda tutynýshylardyń túbirtekterine qaıta esepteý júrgizýi qajet.