«Almaty Jylý» QKK holdınginiń jańa basshysy taǵaıyndaldy
ALMATY. 9 qarasha. QazAqparat /Erbol Turymbetov/ - Almaty qalasy ákiminiń jarlyǵymen jaqynda qurylǵan qalany jylýenergııamen qamtamasyz etetin «Almaty Jylý» qalalyq kommýnaldyq kásiporny holdınginiń basshylyǵyna Mıhaıl Korjov taǵaıyndaldy. Bul týraly Almaty qalasy ákiminiń baspasóz qyzmeti habarlady.
M. Korjov buǵan deıin qala ákiminiń energetıkalyq keshen, kommýnaldyq sharýashylyq jáne turǵyn úı máselelerin damytý jónindegi Bas ınspektory qyzmetin atqaryp keldi.
«Almaty Jylý» QKK holdınginiń quramyna «Almaty jylý jelileri» JShS jáne «Almatyjylýkommýnenergo» JShS kompanııalary kiredi. Ondaǵy «Almaty jylý jelileri» JShS jylý energııasyn berý men taratý jumystaryn atqarady. Al «Almatyjylýkommýnenergo» JShS bý men ystyq sý túrindegi jylý energııalaryn óndirý, berý jáne taratý jumystarymen aınalysady. Sonymen qatar, ony qoldanýshylarǵa baqylaý jasap otyratyn bolady.
Búginde holdıng aldyna jylý sharýashylyǵyn jetkilikti ári ysyrapsyz etý mindetteri qoıylyp otyr.
Qalany jylýmen bir ǵana kompanııa qamtamasyz etetin bolǵandyqtan, onyń tarıfteri de birdeı bolmaq. Buǵan deıin jylýenergııa tarıfteri ár kompanııanyń talabyna saı ár túrli bolyp kelgen edi. Qazirgi ýaqytta qala basshylyǵy naqty baǵany belgilep te qoıdy. Ol antımonopolııa agenttiginiń bekitýinen keıin engiziletin bolady.
Qalanyń barlyq qazandyqtary qazir túrlendirý qarsańynda tur. Sonymen birge, gaz ben sýdyń qoldanylý mólsherin eseptep otyratyn, óndirilgen jylýdyń anyq ári naqty kólemin beretin avtomatty jylý eseptegish qurylǵysy engizilý ústinde.
