Almaty jurtshylyǵy Ulystyń uly kúnin toılaýda (FOTO)
Dýmandy kontsertpen bastalǵan merekeni qala ákimi Ahmetjan Esimov quttyqtaý sózben ashty.
«Halqymyz Naýryzdy jańarý men jasampaz jyldyń bastaýy, aqtyń molaıyp, qut-berekeniń kelýi dep bilgen. Qazaq tarıhynda bul mereke salt-dástúrimizdiń, myzǵymas birlik pen dostyqtyń sımvolyna aınaldy. Bizdiń eń basty qundylyǵymyz bereke-birligimiz. Qalamyzdyń áleýeti men kórikti sáýleti artyp, kelbeti ajarlana tústi. Qala halqynyń berekeli birliginiń arqasynda ekonomıkanyń barlyq salalarynda qarqyndy damý bar. Bunyń barlyǵy sizderdiń arqalaryńyzda. Ulys oń bolsyn, aq mol bosyn!»- dedi óz quttyqtaýynda qala basshysy Ahmetjan Esimov.
Jıylǵan qaýym jańarýdyń sımvoly ispettes Naýryzdyń keıipkerleri Qydyr Ata men Umaı anany qarsy alyp, olardyń izgi batasyn aldy.
Mereke qazaq estaradasynyń juldyzdary Aıgúl Qosanova, Shaba Ádenqulova, «Saryn» toby, «Móldir» balalar ujymynyń oryndaýyndaǵy kontsertpen ulasty. Alańda ondaǵan kıiz úı tigilip kelgen meımandar ulttyq taǵam túrlerinen, naýryz kójeden dám tatýda.
Búgin Respýblıka alańynda kelýshiler ulttyq sport túrlerinen jarysqa qatysyp, túrli jármeńkeler men kórmelerden ózine qajetti buıymdardy alýda. Alań asfaltyn balalar ózderiniń alańsyz ómirin beıneleıtin sýrettermen bederlep tastaǵan.
Qala jastary altybaqan teýip, qazaq ertegileriniń Tazsha bala, Jalmaýyz kempir syndy keıipkerlerimen sýretke túsýde.
«Keshke qaraı «Nomad» kaskaderleriniń qoıylymy, balalar shyǵarmashylyǵynyń festıvali men merekelik ot-shashý bolady», - dedi uıymdastyrýshylar.
