Almaty jurtshylyǵy memleket jáne qoǵam qaıratkeri B.Áshimovti sońǵy saparǵa attandyryp saldy
ALMATY. Aqpannyń 8-i. QazAqparat /Ádilet Musahaev/ - Keshe Almaty jurtshylyǵy Abaı atyndaǵy opera jáne balet teatrynda kórnekti memleket jáne qoǵam qaıratkeri, Sotsıalıstik Eńbek Eri Báıken Áshimovty aqtyq saparǵa shyǵaryp saldy,
dep habarlaıdy QazAqparat.
Báıken Áshimovti sońǵy saparǵa shyǵaryp salýǵa qoǵamdyq jáne saıası qaıratkerler, depýtattar, ǵylym, mádenıet jáne óner salasynyń ókilderi jınaldy. Sondaı-aq B.Áshimovtyń týǵan-týystaryna kóńil bildirgen kóptegen jedelhattar kep jatty.
«Daryndy saıasatker, talantty basqarýshy, zeınetke shyqqan soń da aıtýly, maǵynaly oqıǵalarǵa qatysyp júrdi. Ol árqashan da jańa bastamalarǵa umtylyp, Elbasynyń barlyq bastaýlaryn qoldaıtyn. Qazaqstan Respýblıkasynyń astanasyn Almatydan Astanaǵa aýystyrǵan kezde barlyq aqsaqaldardyń atynan jańa elordaǵa óz batasyn bergen bolatyn. B.Áshimovtyń 40 jyldyq ómiri osy Almaty qalasymen tyǵyz baılanysty. Ol qala ómirine belsendi atsalysyp, árqashan qamqorlyqpen qaraıtyn. Sonymen qatar qalanyń bolashaǵyna alańdaýshylyq bildirip, ony damytýǵa jáne órkendeýine óz tilekterin árdaıym aıtyp júretin», deıdi Almaty qalasynyń ákimi Ahmetjan Esimov.
Sondaı-aq qoshtasý barysynda QR Parlamenti Májilisiniń Tóraǵasy Oral Muhamedjanov, Premer-Mınıstrdiń birinshi orynbasary Ómirzaq Shókeev, Parlament Májilisiniń depýtaty Kenjeǵalı Saǵadıev, Soltústik Qazaqstan oblysynyń ákimi Serik Bilálov pen marqumnyń týystary sóz sóıledi.
Báıken Áshimov «Keńsaı-1» beıitine jerlendi.
