Almaty jurtshylyǵy kórnekti memleket jáne qoǵam qaıratkeri Maqtaı Saǵdıevti aqtyq saparǵa shyǵaryp saldy
ALMATY. 28 tamyz. QazAqparat - Búgin Almatyda Qazaq memlekettik Abaı atyndaǵy opera jáne balet teatrynda asa kórnekti memleket jáne qoǵam qaıratkeri Maqtaı Ramazanuly Saǵdıevti aqtyq saparǵa shyǵaryp salý rásimi ótti.
Oǵan marqumnyń áriptesteri, zamandastary, úzeńgiles ini-qaryndastary jáne ózge de qala turǵyndary men qonaqtary jınaldy.
«Aǵamyzdy sońǵy saparǵa shyǵaryp salýǵa Elbasymyz erekshe kóńil bólip, Úkimetke tapsyrmalar berdi. Qazaqstannyń barlyq óńirleri aǵamyzdyń qazasyna qaıǵyryp kóńil aıtyp jatyr. Solardyń alǵashqysy bolyp Nursultan Nazarbaev aǵamyzdyń otbasyna kóńil aıtyp, jedel hatyn joldady», - deıdi Elbasynyń jedelhatyn jınalǵan jurtshylyqqa oqyp bergen QR Memlekettik hatshysy Muhtar Qul-Muhammed. Onda QR Prezıdenti: «Maqtaı Ramazanuly asa joǵary laýazymdy qyzmetterdi zor abyroımen atqaryp, óziniń bar bilimi men uıymdastyrýshylyq darynyn týǵan eliniń ıgligine jumsady. Mınıstr bolyp, oblys basqardy. Respýblıkamyzdyń eń mártebeli organyna depýtat bolyp saılanyp, QazKSR Joǵary Keńesiniń prezıdýmyna basshylyq jasady. Zeınetkerlikke shyqqannan keıin de qoǵam ómirinen qol úzbeı, kóp jyl boıy elimizdegi ardagerler keńesiniń jumysyna basshylyq etti. Qaı qyzmette de ózin qarapaıym, jan júregi adal, ár istiń kózin biletin bedeldi tulǵa retinde tanytyp, halqymyzdyń shynaıy qurmeti men súıispenshiligine bólendi. Eńbegi joǵary memlekettik nagradalarmen atap ótildi. Ol kisiniń eńbegi men jarqyn dıdaryn halqymyz umytpaıdy. Marqumnyń jany janatta, topyraǵy torqa bolsyn», - degen júrekjardy tilegin aıtqan.
