Almaty jurtshylyǵy kórnekti ǵalym-quqyqtanýshy, QR UǴA akademıgi, professor Ǵaırat Saparǵalıevty sońǵy saparǵa shyǵaryp saldy
Y. Shildeniń 22-si. QazAqparat /Erbol Azanbek/ - Búgin Almatyda kórnekti ǵalym-quqyqtanýshy, QR UǴA akademıgi, professor, QR eńbek sińirgen zańgeri, Qazaqstan prokýratýrasynyń eńbek sinirgen qyzmetkeri Ǵaırat Saparǵalıevpen qoshasý rásimi ótti. Qoshtasý sharasyna ǵalymnyń áriptesteri, shákirtteri, memlekettik organdardyń qyzmetkerleri, qala jurtshylyǵy qatysty.
Shara barysynda Elbasynyń kóńil aıtý hatyn QR Mádenıet mınıstri Muhtar Qul-Muhammed oqyp berdi. «Ǵaırat Saparǵalıev Qazaqstan memleketiniń qurylýy jolynda júrgen azamattardyń biri. Ol Táýelsiz Qazaqstannyń Ata zańynyń jasalýyna, otandyq zań ǵylymynyń qalyptasýy men damýyna ólsheýsiz úles qosty. Onyń ómirden ótýine baılanysty meniń shyn júrekten kóńil aıtýymdy qabyl alyńyzdar» delingen jedelhatta. Óz kezeginde QR UǴA Prezıdenti, akademık Murat Jurynov otandyq zań ǵylymynyń orny tolmas aýyr qaıǵyǵa dýshar bolǵanyn atap ótti. «Ǵaırat Saparǵalıev ǵylymǵa shyn berilgen tulǵa edi. Onyń jetekshiligimen 6 doktorlyq, 40 kandıdattyq dıssertatsııa qorǵaldy. 60-tan astam monografııanyń, kóptegen kitaptar men eńbekterdiń avtory. Ol artyna shákirtteriniń úlken shoǵyryn qaldyrdy» dedi M.Jurynov.
Ǵaırat Saparǵalıev 1930 jylǵy 26 maýsymda Semeı qalasynda dúnıege kelgen. 1952 jyly Saratov zań ınstıtýtyn, 1955 jyly KSRO Ǵylym akademııasy Quqyq ınstıtýtynyń aspırantýrasyn bitirgen. 1967 jyly "Qazaqstandaǵy ult-azattyq qozǵalysyna qarsy patsha úkimetiniń jazalaý saıasaty" degen taqyrypta doktorlyq dıssertatsııa qorǵady. Qazaqstan Ulttyq Ǵylym akademııasynyń korrespondent múshesi (1989), akademıgi (2003) bolyp saılandy. 1955-1992 jyldarda Qazaq KSR Ǵylym akademııasynda fılosofııa jáne quqyq ınstıtýtynyń ǵalym-hatshysy, aǵa ǵylymı qyzmetkeri, bólim meńgerýshisi, dırektordyń orynbasary bolyp qyzmet istedi. 1992-2000 jyldarda Almaty memlekettik ýnıversıteti zań fakýltetiniń dekany, Qazaqstan Ǵylym akademııasynyń Memleket jáne quqyq ınstıtýtynyń dırektory, Qazaq gýmanıtarlyq zań akademııasynyń Memleket jáne quqyq ınstıtýtynyń dırektory. Sońǵy jyldarda Ál-Farabı atyndaǵy Qazaq ulttyq ýnıversıteti Memleket jáne quqyq ınstıtýtynyń dırektory bolyp qyzmet istedi. QR Joǵary Sot Keńesiniń múshesi boldy. Kórnekti tulǵa jaqynda 80-ge tolǵan mereıtoıyn atap ótken edi.Marqum Keńsaı zıratyna jerlendi.
