Almaty jurtshylyǵy kórnekti aktrısa Farıda Sháripovany sońǵy saparǵa shyǵaryp saldy
ALMATY. Qyrkúıektiń 27-si. QazAqparat /Ádilet Musahaev/ - Búgin Almaty jurtshylyǵy Qazaq teatrynyń altyn dińgegine aınalǵan,
KSRO halyq ártisi, Memlekettik syılyqtyń laýreaty, «Parasat» ordeniniń ıegeri, M. Áýezov atyndaǵy akademııalyq drama-teatrdyń belgili aktrısasy Farıda Sháripovany sońy saparǵa shyǵaryp saldy.
«Búgin qazaq óneriniń jaryq juldyzy sóndi. Shekaranyń arǵy jaǵynda 17 jasynan bastap kınoǵa túse bastaǵan Farıda apaıymyz ómiriniń sońyna deıin óner sahnasynda aıanbaı eńbek etti», dedi óz sózinde QR Mádenıet mınıstri Muhtar Qul-Muhamed. OlF.Sháripova Qazaq teatrynda erekshe oryn alatyn aktrısa ekendigin jáne jastarǵa naǵyz ónerdiń jolyn qalap bergendigin aıta kele, Elbasy Nursultan Nazarbaevtyń kóńil aıtý hatyn oqyp berdi.
Qoshtasý rásimine aktrısanyń týǵan-týystary, dostary, sahnalas áriptesteri men alys-jaqynnan onyń ónerine tabynýshy adamdar keldi.
«Farıda apaı ananyń meıirin, ananyń balaǵa, jaryna degen qazaqy mahabbatyn ózgeshe jetkize bilgen adam. Sahnada oınaǵanda keıipkerdiń janyn bar bolmysymen túsinip, kórermen júregine dál jetkize biletin aktrısa. Ol qandaı ról bolmasyn óziniń daryndylyǵymen jáne sahnadaǵy mol tájirıbesimen sátti oryndap shyǵatyn», deıdi M. Áýezov atyndaǵy akademııalyq drama-teatrdyń ártisi Saıat Merekeuly.
F.Sháripova qazaqstandyq kórermenderge «Súıikti meniń áýenim» spektaklindegi Jámıla, Sh.Aıtmatovtyń «Ana-Jer-Anadaǵy» Tolǵanaı, M.Áýezovtyń «Abaıyndaǵy» Ajar, «Qozy Kórpesh-Baıan Sulýdaǵy» Baıan (Ǵ.Músirepov), «Eńlik-Kebektegi» Eńlik, «Qarakózdegi» Qaragóz, Á.Nurpeıisovtyń «Qan men terindegi» Aqbala rolderimen tanymal boldy.
