Almaty jurtshylyǵy Qajymqan Másimovti aqtyq saparǵa shyǵaryp saldy
ALMATY. QazAqparat - Almaty jurtshylyǵy qoǵam qaıratkeri, Qazaqstan Ulttyq Agroónerkásiptik palatasynyń tóraǵasy Qajymqan Másimovti baqılyq saparǵa shyǵaryp saldy, dep habarlaıdy QazAqparat tilshisi.
Qoshtasý rásimi QR Ǵylym akademııasy ǵımaratynda ótti. Qaraly jıynǵa Almaty ákimi Baýyrjan Baıbek, QR Qorǵanys mınıstri Nurlan Ermekbaev, Qaırat Kelimbetov, Ǵanı Qasymov qatysty.
Qala ákimi Baýyrjan Baıbek QR Tuńǵysh Prezıdenti - Elbasy Nursultan Nazarbaev pen QR Prezıdenti Qasym-Jomart Toqaevtyń kóńil aıtý jedelhatyn oqyp berdi.
«Qurmetti Kárim Qajymqanuly! Ákeńizdiń mezgilsiz dúnıeden qaıtýyna baılanysty qaıǵylaryńyzǵa ortaqtasyp kóńil aıtamyn. Ol kisi kásipkerlik qyzmetpen aınalysyp, Qazaqstan ekonomıkasyna ólsheýsiz úles qosty. Ol bar bilimin eliniń baqýatty bolýyna arnady. Topyraǵy torqa bolsyn!», - dep jazylǵan Elbasy jedelhatynda.
Odan bólek, jınalǵan halyq aldynda belgili ǵalym Murat Jurynov, memleket qaıratkeri Qanat Saýdabaev, Parlament Májilisi tóraǵasynyń orynbasary Vladımır Bojko sóz sóıledi. Sonymen qatar, Nur Otan partııasy tóraǵasynyń orynbasary Máýlen Áshimbaev, QR Eńbek jáne áleýmettik qorǵaý mınıstri Berdibek Saparbaev, oblys ákimderi men Túrkııa úkimetiniń ókilderi kóńil aıtty.
Aıta ketý kerek, Qajymqan Másimov 80 jasqa qaraǵan shaǵynda kóz jumdy.
