Almaty jurtshylyǵy Qazaqstan Shekara qyzmetiniń basshysyn sońǵy saparǵa shyǵaryp saldy
ASTANA. 3 qańtar. QazAqparat - Almatynyń barlyq turǵyndary shekarashylardyń qazasyna qatty qaıǵyryp, qaıtys bolǵandardyń týystarymen birge aza tutady.
Biz olarǵa shynaıy kóńilimizdi bildirip, orny tolmas qaıǵylarymen bólisemiz. Búgin Almaty qalasynda 25 jeltoqsan kúni Shymkent qalasy mańynda AN-72 ushaǵynyń apaty saldarynan qaza tapqan Qazaqstan Shekara qyzmetiniń basshysy polkovnık Turǵanbek Stambekovpen jáne onyń jubaıy Sáýle sońǵy saparǵa shyǵaryp salý kezinde qala ákimi Ahmetjan Esimov osylaı aıtty.
Shekara qyzmetiniń basshysyn sońǵy saparǵa shyǵaryp salý Almatydaǵy UQK Shekara qyzmeti Akademııasynda ótti. Azaly sharaǵa QR UQK Tóraǵasy Nurtaı Ábiqaev, áskerı qyzmetshiler jáne shekara qyzmetiniń ardagerleri qatysty.
T.Stambekov 1961 jyly Almaty oblysy Shelek aýylynda dúnıege kelgen. 1983 jyly Almaty shekara ýchılışesin bitirdi. Járkent, Úsharal shekara otrıadtarynda, sosyn UQK áskerı ınstıtýtynda qyzmetter atqardy. 2004 jyldan 2008 jylǵa deıin Shonjy shekara otrıadynyń basshysy boldy.
KSRO MQK Joǵary shekara komandalyq ýchılışesiniń, Reseı Federatsııasy Federaldyq Shekara qyzmeti Akademııasynyń túlegi T. Stambekov táýelsizdigimizdi nyǵaıtý jolynda eńbek etip, qoǵam men memleket qaýipsizdigin kúsheıtýge úlken úles qosqan tulǵa edi. Ol otandyq shekara qyzmetin qalyptastyrýdyń bastaýynda bolyp, qashanda ózine júktelgen mindetterdi abyroımen atqara bildi. Pedagogıka ǵylymdarynyń kandıdaty ǵylymı ataǵyn da ıelendi. ІІ dárejeli «Aıbyn» ordenimen jáne 20-ǵa tarta vedomstvolyq nagradalarman marapattaldy.
Ózimen birge qazaǵa ushyraǵan jubaıy Sáýle ekeýi Almas atty ul men Halıda atty qyzdaryn tárbıelep ósirdi.
Eske sala keteıik, 25 jeltoqsanda Ońtústik Qazaqstan oblysy Saıram aýdanynda Astana-Shymkent baǵytymen ushyp kele jatqan AN-72 áskerı-kóliktik ushaǵy apatqa ushyraǵan bolatyn. Borttaǵy 27 adamnyń bári qaza tapty.
