Almaty jurtshylyǵy Hadısha Bókeevany aqtyq saparǵa shyǵaryp saldy

Óner maıtalmanyn sońǵy saparǵa shyǵaryp salýǵa týǵan-týystary, dostary ári qyzmettes bolǵan adamdar men shákirtteri jáne QR óner qaıratkerleri keldi. Qaraly jıyndy M.Áýezov atyndaǵy akademııalyq drama teatrynyń bas dırektory, QR halyq ártisi Esmuhan Obaev óziniń kóńil bildirý sózimen ashyp, búgingi jaıt búkil halyq úshin úlken qaıǵy ekendigin aıtyp ótti.

Al QR Mádenıet mınıstrliginiń vıtse-mınıstri Asqar Bóribaev mınıstrlik atynan oryn tolmas qaıǵyǵa ortaqtasatyndyǵyn aıta kele Elbasynyń kóńil bildirý hatyn oqyp berdi. «Esimi halyqqa keńinen tanymal óner ıesi H.Bókeevanyń ómirden ozýyna baılanysty aýyr qaıǵylaryńyzǵa ortaqtasqan kóńil aıtýymdy qabyl alyńyzdar. Uzaq ta ǵıbratty ǵumyr keshken ol kisiniń ult teatr, kıno sahnasynda somdaǵan aıshyqty beınelerin óner súıer qaýym qashanda qyzyǵy tamashalap, rýhanı lazzát alatyn», -delingen hatta.

Hadısha apanyń áriptesi, QR halyq ártisi, Memlekettik syılyqtyń laýreaty Sábıt Orazbaev óner maıtalmanynyń qara shańyraq M.Áýezov atyndaǵy akademııalyq drama teatrynda ǵajaıyp dúnıeler jasap, Katarına hanshaıymy syndy rólderdi somdaǵanda teatrǵa adam syımaı ketetindigin aıtyp eske aldy. «Ol kisi qandaı obrazdy somdasa da óte sapaly, bıik deńgeıde kórsetken edi. Apamyzdyń taǵy bir eren eńbegi shákirt tárbıeleý boldy. Ol «adam qaıtkende - adam bolyp qalady» degen qaǵıdany shákirtteriniń boıyna sińire bildi», -deıdi S.Orazbaev.

Sonymen qatar marqumdy sońǵy saparǵa shyǵaryp salýǵa óziniń týǵan ólkesi Batys Qazaqstan oblysy ákimdiginen delegattar da kelipti.

Hadısha Bókeeva 31 qańtar kúni 93 jasqa qaraǵan shaǵynda ómirden ozdy.

BQO-nyń Qaztalov aýylynda dúnıege kelgen Hadısha Bókeeva alǵashqy sahnalyq qadamyn kórkemónerpazdar úıirmesinen bastaǵan edi. 1938 jyly Lenıngradtyń memlekettik sahna óneri tehnıkýmynyń qazaq stýdııasyn bitirgen ol Shymkent oblystyq Qazaq drama teatrynda, al 1942 jyldan Almatydaǵy Qazaq drama teatrynda uzaq jyldar boıy jemisti eńbek etip, el esinde qalǵan talaı rolderdi tamasha oryndady. Ol somdaǵan rolderdiń ishinde Sáýleniń (Ábishevtiń «Dostyq pen mahabaty»), Qarlyǵanyń (Áýezovtyń «Qobylandy»), Mehmene Banýdyń (Nazym Hıkmettiń «Mahabbat týraly ańyzy»), Katarınanyń (Shekspırdiń «Ýkroşenıe stroptıvoı»), Sáýleniń (T.Ahtanovtyń osy attas týyndysy), Thannyń (Kýprııanovtyń «Zvezda Vetnama» týyndysy) rolderi bar.

1957 jyly Qazaqstannyń halyq ártisi, 1964 jyly KSRO halyq ártisi atanǵan óner sańlaǵy ustazdyq qyzmetpen de aınalysyp, professor (1974) ataǵyna ıe boldy. Elge tanymal kóptegen sahna sheberlerin tárbıelep, Lenın, «Qurmet Belgisi» ordenderimen marapattalǵan.