Almaty jurtshylyǵy Alǵys aıtý kúnin toılaýda (FOTO)
ALMATY. QazAqparat - Almaty jurtshylyǵy Alǵys aıtý kúnin toılaýda. Búgin Dostyq úıiniń mańynda jınalǵan túrli ult ókilderi ánnen shashý shashyp, merekelik dastarhan jaıdy.
«Búgin barshańyzdy Elbasy jarlyǵymen tuńǵysh ret toılanǵaly otyrǵan Alǵys aıtý kúnimen quttyqtaımyn. QHA qurylǵan kúnimen tuspa tus kelgen mereke elimizdegi ulttar dostyǵyn odan ári kúsheıtetinine senimimiz kámil. Búgingi Alǵys kúni Elbasy Jarlyǵymen Táýelsiz Qazaqstandy qurý jolynda aıanbaı ter tókken, taǵdyr tálkegimen Qazaqstanǵa eriksiz qonys aýdarǵan ulttardyń urpaqtarynyń baýyrlas halyqqa, týǵan elge, týǵan jerge degen taǵzym kúni dep esepteımiz. Halqymyzda «altyn alma, alǵys al» degen ataly sóz bar. Dál osy kontseptsııaǵa negizdelgen Elbasy saıasatynyń arqasynda úlken mindetterdiń údesinen shyǵyp, bolashaqta Otanymyz Qazaqstan álemniń damyǵan 30 eliniń qatarynan tabylaryna senimdimin», - dedi qala ákiminiń orynbasary Arman Qyryqbaev.
Kelýshiler respýblıkalyq jáne Almaty qalalyq etnomádenı birlestikterdiń kórmesin, Almaty qalasy EMB-diń daıyndaǵan «Bir el bir otbasy» sýret kórmesin, ulttyq birlik, ultaralyq jáne konfessııaaralyq kelisim taqyrybynda kórkem týyndylar baıqaýyna qatysýshylardyń sýretter kórmesin tamashalady.
Jınalǵan adamdar merekelik dastarhannan dám tatty. Aıta keteıik, Qazaqstan Respýblıkasynyń Prezıdenti Nursultan Nazarbaevtyń 2016 jyly 14 qańtardaǵy Jarlyǵymen Qazaqstanda Alǵys aıtý kúni bekitildi.
1995 jyldyń 1 naýryzynda elimizde Qazaqstan halqy Assambleıasy quryldy jáne 2015 jyly Assambleıanyń jıyrma jyldyǵyn merekeleý aıasynda Memleket basshysy bul kúndi halyqtardyń bir-birine jáne qazaqtarǵa kóptegen halyqtar elge kúshtep qonystandyrylǵan kezde tózimdilik pen qonaqjaılylyq tanytqany úshin alǵys bildire alatyn kún dep jarııalaýdy usyndy.
