Almaty jurtshylyǵy akademık Aıtmuhamed Abdýllındi sońǵy saparǵa shyǵaryp saldy
ALMATY. Maýsymnyń 15-i. QazAqparat /Názıra Eleýhan/ - Búgin Almaty jurtshylyǵy QR Ulttyq ǵylym akademııasynyń akademıgi, QR Ulttyq ınjenerlik akademııasy Tóralqasynyń múshesi, KSRO Memlekettik syılyǵynyń laýreaty, Qazaq KSR jáne akademık Q.I.Sátbaev atyndaǵy syılyqtyń ıegeri Aıtmuhamed Abdýllındi sońǵy saparǵa shyǵaryp saldy,
dep habarlaıdy QazAqparat.
A.Abdýllın 1924 jyly 24 qarashada Qaraǵandy oblysy, Qarsaqbaı (qazirgi Ulytaý) aýdany, Ulytaý aýylynda dúnıege kelgen. Jastyq shaǵy Uly Otan soǵysy jyldaryna tuspa-tus kelip, ol 17 jasynda óz erkimen maıdanǵa attanyp, Stalıngrad shaıqastaryna qatysyp, búkil Eýropa elin aralap, soǵystyń sońǵy kúnin Japonııada ótkergen.
S.M.Kırov atyndaǵy Qazaq Memlekettik ýnıversıteti geologııa-geografııa fakýltetiniń túlegi, Qanysh Sátbaevtyń úzeńgilesi, akademık Abdýllınniń esimi bizdiń elimizge jáne shet elge jaqsy tanys. Qumkól ken orynyn alǵash ashqan jáne aımaqtyq geologııa, geotektonıka, stratıgrafııa, metallogenııa, munaı jáne gaz óndirý geologııasy salasynyń dara mamany retinde keńinen tanymal. Ol 400 ǵylymı jumystyń, 10 monografııanyń avtory.
Belgili ǵalym KSRO-nyń birneshe ordenderimen jáne medaldarymen marapattalǵan. Ol sondaı-aq, Qazaqstannyń qurmetti ınjeneri, «Qazaqstannyń Qurmetti ken izdeýshisi» ataǵynyń ıegeri.
A. Abdýllınniń esimi Almaty qalasynyń Altyn kitabyna engizilgen.
Ǵalym 86 jasqa qaraǵan shaǵynda dúnıeden ótti.
