Almaty joldarynda jyl basynan beri ereje 440 myń ret buzyldy - ІІD
ALMATY. QazAqparat - Almaty joldarynda bıylǵy jyldyń basynan beri jol qozǵalysy erejesiniń shamamen 440 myń ret buzylǵandyǵy anyqtaldy. Sáıkesinshe, ereje buzǵan júrgizýshiler 1,5 mıllıard teńgedeı aıyppul tóledi. Bul týraly búgin Almaty qalalyq ІІD baspasóz qyzmetinen habarlady.
Almaty qalalyq ishki ister departamentiniń derekteri boıynsha, ótken kezeńde 182 myńnan astam avtokólik júrgizýshisi ákimshilik jaýapkershilikke tartylǵan. Olardyń ishinde 1 102 júrgizýshi kólik quralyn mas kúıinde aıdaǵan.
2 028 júrgizýshi sot sheshimimen kólik quralyn basqarý quqyǵynan aıryldy. 54 avtoáýesqoıǵa qatysty ákimshilik qamaý sharasy qoldanyldy. Ákimshilik quqyq buzýshylyq boıynsha 1 mıllıard 487 mıllıon 169 myń teńgege aıyppul salyndy.
«Jol qozǵalysy erejesin buzý áreketterin tejeıtin jáne aldyn alatyn faktorlardyń biri - «Jol qozǵalysy qaýipsizdigi» avtomattandyrylǵan aqparattyq júıesi. Bul júıe 125 beketten turady. Olardyń ishinde 105 - «Jol qozǵalysy qaýipsizdigi» avtomattandyrylǵan aqparattyq júıesi beketi, 10 - ІІD operatıvtik basqarý ortalyǵynyń beınekamerasy jáne 10 «KRIS-P» mobıldi kesheni bar. Solardyń kómegimen 244 myń 252 quqyq buzýshylyq áreket tirkeldi. 3 mıllıard 359 mıllıon 011 myń teńgege aıyppul salyndy. Qazirgi tańda Almaty qalasy ákimdigimen birge qalalyq ekologııalyq «Qorshaǵan ortany lastaýdy azaıtý boıynsha 2009-2018 jyldarǵa arnalǵan baǵdarlamany» júzege asyrý jáne tehnıkalyq aqaýy bar kólikterdiń qalaǵa kirýine shekteý qoıý boıynsha sharalar qoldanyp jatyr. Mysaly, qalaǵa enetin negizgi joldarǵa ornatylǵan 10 ekrologııalyq bekette paıdalanylǵan gazdyń aýaǵa shyǵarylý normasyn baqylaý boıynsha turaqty túrde jumystar atqarylýda», - dedi Almaty qalalyq ІІD resmı ókili, polıtsııa maıory Saltanat Ázirbek.
Almaty polıtsııasynyń deregi boıynsha jyl basynan beri qalada ekologııalyq norma 19 949-dan astam ret buzylǵan. Olardyń ishinde syrttan keletin avtokólikter tarapynan ekologııalyq normalardy buzý oqıǵalarynyń sany - 13 myń 990. Sáıkesinshe, 98 mıllıon 747 myń 395 teńge aıyppul salyndy.
Aıta ketelik, Almatyda búgingi tańda 551 myń 974 kólik quraly tirkelgen. Al qaladaǵy avtokólik joldarynyń jalpy uzyndyǵy - 2 299 shaqyrym.
