Almaty joldaryna qys kezinde 20 myń tonnaǵa jýyq tuz sebiledi

ALMATY. QazAqparat- Megapolıstiń kommýnaldyq qyzmeti qysqy maýsymda kóshelerdi qardan tazartýǵa daıyn. Bul týraly óńirlik kommýnıkatsııalar qyzmetinde ótken baspasóz máslıhatynda «Almaty tazalyq» kásipornynyń dırektory Ádilet Toqtasynov málim etti, dep habarlaıdy QazAqparat tilshisi.

Spıkerdiń sózinshe, qys kezinde kásiporyn mamandandyrylǵan 704 tehnıkany jumyldyrady.

«Qazirgi ýaqytta 173 quramaly tazalaý mashınasynyń 156-sy (90%) joldardy qysta kútip ustaýǵa arnalǵan qondyrmamen almastyryldy. Sonymen qatar, kásiporynnyń 728 jol jumysshysy, 272 mehanızator jáne 398 júrgizýshi tartylady. Jalpy shtat sany - 1728 adam. Budan bólek, kúzgi-qysqy kezeńge qosalqy merdigerler esebinen qala kóshelerindegi japyraqtar men qardy shyǵarý úshin 1000-ǵa jýyq jol jumysshysy jáne 200-ge jýyq arnaıy tehnıka tartý josparlanǵan»,- dedi ol.

«Almaty tazalyq» mekemesiniń dırektory kásiporynnyń 7 óndiristik jáne 7 qum bazasy bar ekenin aıtty.

Olar qajetti materıaldyq-tehnıkalyq resýrstarmen jabdyqtalǵan.

«Kóktaıǵaqqa qarsy sebý úshin 15 myń tonna tuz jáne 38 myń tonna súzgi satyp alý josparlanǵan. Onyń ishinde 17 myń tonnaǵa jýyq tuz jáne 38 myń tonna tuz qaldyǵy daıyndaldy. Qosalqy merdigerler 2124 tonna tuz, 9700 tonna tuz qaldyǵyn ázirleıdi»,- dedi spıker.

Jyl sońyna deıin kommýnaldyq ınfraqurylymdy damytý basqarmasy 669,3 mln teńgege 17 tehnıka satyp alýdy josparlap otyr .

«Bıyl kásiporyn esebinen 263,6 mln teńgege 22 tehnıka satyp alyndy. Bul - traktordyń jartylaı tirkemesi, bıtým peshi jáne taǵy basqalary»,- dedi Ádilet Toqtasynov.