Almaty joldaryn kútip ustaýǵa bıyl 13 mlrd teńge bólingen
ALMATY. QazAqparat - Almatyda kóshe joldaryn kútip ustaýmen 10 merdiger uıym aınalysady. Bul týraly Óńirlik kommýnıkatsııalar qyzmeti brıfınginde Almaty qalasynyń kommýnaldyq ınfraqurylymdy damytý basqarmasy basshysynyń orynbasary Dýlat Eshkenov aıtty, dep habarlaıdy QazAqparat tilshisi.
Spıkerdiń aıtýynsha, Almatyda qala kóshelerin kútip ustaý jumystary (qalalyq mańyzy bar kósheler (magıstraldyq), aýdandyq mańyzy bar kósheler jáne jergilikti mańyzy bar kósheler) úsh baǵyt boıynsha júrgiziledi.
«Osyǵan sáıkes kóshe tazalaý jumystary qalalyq mańyzy bar kóshelerde táýligine keminde 2 ret, aýdandyq mańyzy bar kóshelerde táýligine 1 ret jáne jergilikti mańyzy bar kóshelerde aptasyna keminde bir ret júrgiziledi. Alaıda, bul jol qyzmetkerleriniń jumystary osymen shekteledi degen sóz emes. Ártúrli jaǵdaı men aýa raıyna baılanysty úzdiksiz qozǵalysty qamtamasyz etý úshin jumystar toqtamaıdy», - dedi D.Ashkenov.
Ol bıyl jazda Almaty qalasynyń kóshelerinen 1000-nan astam arnaıy tehnıkanyń kúshimen 90 tonnadan astam qoqys shyǵarylǵanyn, al qysqy mezgilde qar shyǵarý, kóktaıǵaqty aldyn alý jumystary júrip jatqanyn habarlady.
«Qazir «Almaty tazalyq» kásiporny qysqa 100% daıyn. Búgingi kúni biz Polıtsııa departamentimen birlesip qar tazalaý jumystary kezinde jol qozǵalysynyń shemasyn pysyqtap jatyrmyz. Jalpy, qalaǵa túsken alǵashqy qar daıyndyǵymyzdyń sátti bolǵanyn kórsetti, merdiger uıymdardyń negizgi mindetteri oryndaldy«, - dedi ÓKQ spıkeri.
Ol sondaı-aq jolaýshylarǵa úlken jaýapkershilik júkteletin jaýapty kezeń bastalǵanyn atap ótti.
«Kúz mezgili aıaqtalǵaly beri birneshe aı ishinde biz bul jaýapty kezeńge daıyndalý úshin jumys josparymyzdy belgiledik. Aıtý kerek bıylǵy jyly Almaty joldaryn jyldyq kútip ustaýǵa 13 mlrd teńge bólindi. Almaty joldary uǵymyna aryq jelileri, trotýarlar, jalpyǵa ortaq paıdalanylatyn aýmaqtar jáne taǵy basqalar kiredi»,- dedi Dýlat Eshkenov.
