Almaty jolaýshylar kóligi basqarmasy avtobýstan «qulap ketken» jolaýshy týraly túsinikteme berdi

Esterińizge sala ketelik, oqıǵa ústimizdegi jyly 30 qarashada oryn alǵan. Ǵalamtor jelisinde №86 baǵdarly avtobýstyń artynda kele jatqan avtokóliktiń beınetirkegishine túsirilgen beınebaıan paıda boldy. Avtobýs Súıinbaı kóshesiniń boıymen soltústik baǵytta kele jatqan. Fýrmanov kóshesimen qıylysar tusta «Gelıos» janarmaı quıý beketi mańynda avtobýstan syrtqa qaraı bir jolaýshy jolǵa qulap túsedi. Osyǵan baılanysty Almaty qalasynyń Jolaýshylar kóligi basqarmasy «№1 taksomotor parki» JShS-ine saýal joldaǵan. Óıtkeni avtobýs osy parkke tıesili.

Avtopark basshylyǵy bul beınebaıannyń shyndyqqa janaspaıtyndyǵy týraly málimdedi.

«Beınetaspada jolaýshynyń tek qulaǵan sáti ǵana beınelengen. Shyn mánisinde júrginshi jol ortasyndaǵy bólý jolaǵynda mazasyzdana qol bulǵap, teńselip turǵan. Keıin joldy kesip ótpek bolyp júgire bastaıdy. Beınetirkegishte avtobýstyń sol jaǵynda jeńil avtokóliktiń ketip bara jatqany kórinip tur. Júrginshi júgire bastaǵan sátte ol toqtaıdy. Osy sátte avtobýs ta birden toqtaı qalady. Sonda toqtaǵan avtobýstyń aldynan júgirip ótip bara jatqan júrginshi kenet aıaǵy shalynyp qulap qalǵan», - delingen taksomotor parki ókilderiniń bergen jaýabynda.

Odan basqa, avtopark basshylyǵynyń aıtýynsha, oqıǵa ornyna kelip jetken jedel medıtsınalyq kómek brıgadasy júrginshiniń mas kúıde bolǵandyǵyn anyqtady. Al avtobýs júrgizýshisi oqıǵanyń mán-jaıy anyqtalǵansha jumystan ýaqytsha shettetildi.

«Avtobýs júrgizýshisi kelesi kúni naýqastyń halin bilý úshin aýrýhanǵa baryp, ony tappady. Sóıtse, ol medıtsınalyq kómekten bas tartypty. Biraq qaıda turatyndyǵyn habarlaǵan. Degenmen, tergeýshi ony izdep taba almaı júr. Óıtkeni ol aıtqan mekenjaıynda turmaıtyn bolyp shyqty. Qazir onyń qaıda ekeni belgisiz», - dep jaýap berdi avtopark ókilderi.