Almaty jol polıtsııasy qujaty joq qoǵamdyq kólik júrgizýshisin quryqtady
ALMATY. Shildeniń 29-y. QazAqparat /Erbol Turymbetov/ - Almaty qalalyq ІІD júrgizý qujatynan aıyrylǵan avtobýs júrgizýshisin ustady,
dep habarlaıdy ІІD baspasóz qyzmeti.
Osydan 2 aı buryn 43 jasar 95-shi qoǵamdyq kóliktiń júrgizýshisi mas kúıinde kólik aıdaǵany úshin sot sheshimimen qujatynan aıyrylǵan bolatyn. Óz qyzmetin qupııa jalǵastyrmaq bolǵan júrgizýshi ózine kólik qujatyn almastyratyn jasandy talon jasap alǵan bolyp shyqty.
«Qujattyń qolmen jasalǵandyǵy kúmán týǵyzbaıdy. Bizdiń qyzmetkerlerdiń tekseris júrgizýi barysynda Jandosov pen Altynsarın kósheleriniń qıylysynda turǵan kólik kúdik týǵyzǵan. Polıtsııa avtokóliginiń bortynda ornalasqan arnaıy bazanyń kómegimen bizdiń qyzmetkerler tez arada júrgizýshiniń qujatynan aıyrylǵanyn anyqtady. Bul jaǵdaıda avtopark basshylyǵy úlken qatelik jiberip otyr. Sondyqtan, qalalyq avtoparkterge mundaı jaǵdaıdy boldyrmas úshin qatań baqylaýǵa kóshý kerektigin eskertkim keledi», dedi Almaty qalalyq ІІD Jol polıtsııasy basqarmasynyń bastyǵy, polıtsııa polkovnıgi Arman Sarybasov. Onyń aıtýynsha, jol qaýipsizdigin qamtamasyz etý maqsatynda júrgizýshiler men olardyń basshylyǵyna qatań jazalar qoldanylatyn bolady.
Jyl basynan beri osyndaı tártipsizdik saldarynan 16 qoǵamdyq kólik ókilderi tirkelip, olarǵa 500 myń teńge kóleminde ákimshilik salyq salynǵan. Al bul ustalǵan júrgizýshige ákimshilik salyqpen qatar, jasandy qujat úshin qylmystyq is te qozǵalmaq.
