Almaty jol polıtsııasy adam qaǵyp qashyp ketken júrgizýshini ustady
ALMATY. Tamyzdyń 19-y. QazAqparat - Іstegenin moınymen kótergisi kelmegen «Aınabulaq» móltekaýdanynyń 21 jasar turǵyny ótken kúnderi túngi saǵat on birler shamasynda Boraldaı kóshesimen ketip bara jatyp, 32 jastaǵy Shyǵys Qazaqstan oblysynyń turǵynyn qaǵyp, oqıǵa ornynan iz jasyryp ketken. Alǵan jaraqattarynan bul azamat oqıǵa ornynda jantásilim etken.
«Táýlik ýaqytynyń keshtigine de qaramastan, ózderiniń azamattyq boryshyn joǵary sanaıtyn kýágerlerdiń kómegi izdestirý jumystaryna kóp paıdasyn tıgizdi. Olar oqıǵa ornyna jedel járdem shaqyryp, avtokólik markisi men onyń túsin aıtyp berdi. Ári qaraıǵy jumys krımınalısterdiń enshisinde edi. Oqıǵa bolǵan jerden tabylǵan kóliktiń qosalqy bólshekteriniń synyqtaryn muqııat tekserý arqyly adam qaqqan 124-shi kýzovty «Mersedes» avtokóligi ekendigi anyqtaldy», - dep málimdedi Almaty qalalyq ІІD Jol polıtsııasy basqarmasy bastyǵynyń orynbasary, polıtsııa polkovnıgi Muhtar Túsipov, dep habarlaıdy qalalyq ІІD baspasóz qyzmeti.
Búlingen avtokólik Logovaıa kóshesindegi qaraýsyz qalǵan jeke turǵyn úı aýlasynan tabyldy. Kóliktiń aldyndaǵy maıysqan bólikteri men synǵan tereze áınekteri adam qaqqan jol-kólik oqıǵasynyń bolǵandyǵyn ańǵartqandaı. Al kólik ıesi sál keıinirek ustalǵan bolatyn.
«Atalmysh kólik quralyn K. Esimdi azamat senimhat arqyly meńgergeni anyqtaldy. Eki jyldyq qana júrgizýshilik tájirıbesi bar jas júrgizýshi adam qaqqannan keıin qatty qoryqqanyn alǵa tartyp otyr. Jábirlenýshige alǵashqy dárigerlik kómek kórsetýdiń ornyna, ol oqıǵa ornynan iz jasyryp úlgergen. Bul máselelerdiń barlyǵy da onyń jaýapkershiliksiz jáne júrgizýshilik mádenıetiniń joqtyǵyn kórsetip otyr. Kim biledi, múmkin, alǵashqy dárigerlik kómek der kezinde kórsetilgende jábirlenýshiniń ómirin saqtap qalýǵa bolar ma edi?», - dep atap ótti polkovnık Túsipov.
Qazirgi tańda temir tulpar arnaıy aıyppul turaǵyna jetkizilip, júrgizýshi qylmystyq jaýapkershilikke tartyldy.
