Almaty: Joǵalǵan 15 jasar qyz saýda úıiniń kamerasyna túsip qalǵan
ALMATY. QazAqparat - Almatyda jaqyndary 5 kún boıy izdep júrgen 9 synyp oqýshysy Araılym Jumataevany bireýler saýda úıin aralap júrgen jerinen kórgen, dep habarlaıdy QazAqparat tilshisi.
Qyzdyń týysqandarynyń aıtýynsha, Araılymnyń túngi ýaqytta qaladaǵy saýda úılerin aralap júrgeni beınekameralarǵa túsip qalǵan.
«Bostandyq aýdandyq ІІB qyzmetkerleri bizge «Esentai Mall» ortalyǵyndaǵy kameralardyń birin kórsetti. 8- 9 sáýirge qaraǵan túni ol ortalyqta júrgen, tipti oryndyqtarǵa jatqan. Tańǵy 3:00-ge deıin qyz sol jerde bolǵan. 3 shamasynda ǵımarattyń kúzetshisi ony dalaǵa shyǵaryp jibergen. Eń bastysy Araılym aman», - dedi qyzdyń tátesi Aınur Nyǵmanova.
Aıta ketý kerek, boıjetken joǵalyp ketkeni týraly habarlamadan soń Bostandyq aýdandyq ІІB arnaıy jedel izdestirý tobyn qurǵan bolatyn.
Qazir bul top Almatynyń barlyq nysandaryn qaraýda. Sonymen qatar, izdeý jumystaryna eriktiler de kómektesip jatyr.
Tátesiniń aıtýynsha, Araılymnyń ákesi 5 jyl buryn kóz jumǵan. Anasy aýrýshań, ári basqa qalada turady eken.
Aınur Nyǵmanova Araılymdy óz qyzyndaı tárbıelep otyrǵanyn aıtty.
«Ol óte baısaldy, tipti uıań qyz. Buryn mundaı jaǵdaı bolmaǵan edi. Bir mezgil qydyrǵysy kelgen shyǵar. Kesh batyp ketken soń qoryqqan bolar. Tipti ne oılarymdy da bilmeımin. Ol óziniń anasyna, Qaraǵandyǵa barmaǵan eken. Kóńilimizge qyzdyń aman ekendigi ǵana medet bolyp otyr», - dedi tátesi.
Aıta ketý kerek, Araılym Jumataeva 7 sáýirde úıine kelmegen. 9-synyp oqýshysy qurbylarymen saýda-oıyn saýyq ortalyǵyna qydyrýǵa ketken. Qaıtar ýaqytta qurbylaryn shyǵaryp salǵan Araılym úıine qaıta barmaǵan edi. Ústinde mektep formasy men sur plaş bolatyn.
