«Almaty jastary» turǵyn úı baǵdarlamasynyń aldyn ala qorytyndysy shyqty

ALMATY. QazAqparat – Almaty qalasynyń kommýnaldyq ınfraqurylymdy damytý basqarmasy «Almaty jastary» jeńildetilgen ıpotekalyq turǵyn úı baǵdarlamasynyń aldyn ala qorytyndysyn shyǵardy. Qujattar 15 – 31 mamyr aralyǵynda qabyldandy, dep habarlaıdy QazAqparat tilshisi.

Almaty qalasy ákimdiginiń málimetinshe, qalalyq turǵyn úı baǵdarlamasyna bilim, densaýlyq saqtaý, áleýmettik, kommýnaldyq qyzmetter, joǵary oqý oryndary men ǵylymı-zertteý ınstıtýttary, quqyq qorǵaý organdary, mádenıet, BAQ jáne sport salasynyń qyzmetkerlerinen barlyǵy 11 104 ótinim kelip tústi. Olardyń talaptarǵa sáıkestigi tekserilip, nátıjesinde 3631 ótinim maquldaý aldy.

«Baǵyttar boıynsha jınaǵan upaılaryna baılanysty 1100 úmitkerge saıttaǵy jeke kabınetke «Otbasy bank» AQ-da tólem qabilettiligin rastaý úshin joldama beriletin bolady. Joldama alǵan ótinish berýshiler tólem qabilettiligin baǵalaýdan ótý úshin 15 jumys kúni ishinde «Otbasy bank» AQ-nyń kez kelgen qyzmet kórsetý ortalyǵyna júginýi qajet. Tólem qabilettiligin sátti rastaǵan qatysýshylar 45 kúntizbelik kúnde bastapqy jáne qaıtalama naryqtardaǵy turǵyn úıdi tańdaı alady. Oń baǵalanǵan qalǵan 2531 qatysýshy negizgi tizim tólem qabilettiliginen ótkenge deıin rezervte bolady», - dep atap ótti ákimdikten.

7473 ótinim berýshiniń baǵdarlamadan ótpeý sebebi: jumys ornynyń baǵdarlama talaptaryna sáıkes kelmeýi, QR boıynsha menshik quqyǵynda turǵyn úıdiń bolýy, sońǵy 5 jyl ishinde turǵyn úıdi ıelikten shyǵarý, sońǵy 6 aıda zeınetaqy tólemderiniń bolmaýy, QR boıynsha turǵyn úıdiń bar-joǵy týraly barlyq otbasy múshelerine anyqtamalardyń bolmaýy, azamattyq hal aktilerin memlekettik tirkeýdiń skanerlengen kýáligi (balalardyń týý, neke (erli-zaıyptylyqty) qııý, nekeni (erli-zaıyptylyqty) buzý) týraly anyqtamanyń bolmaýy.

«Almaty jastary» baǵdarlamasy aıasynda ótinimder men qujattardy qaraý qorytyndysy boıynsha tolyq aqparat almaty-zhastary.kz saıtyna ornalastyrylady.