«Almaty jastary» baǵdarlamasynyń qorytyndysy qaıta qaralmaıdy – ákimdik

ALMATY. QazAqparat- Almaty ákimdigi jeńildetilgen turǵyn úı baǵdarlamasy ádiletsiz ótti degen qatysýshylarǵa jaýap berdi, dep habarlaıdy QazAqparat tilshisi.

Almaty ákimdiginiń málimetinshe, 2022 jylǵy 1 maýsymda aıaqtalǵan «Almaty jastary» qalalyq jeńildikpen nesıelendirý baǵdarlamasy aıasynda ótinishter men qujattardy qabyldaý qorytyndysy boıynsha 11 199 ótinish túsken, 9 526 ótinim konkýrstan ótpedi. Onyń ishinde 5042 úmitkerdiń ótinishi qabyldanǵan joq.

«Sebebi, Qazaqstan Respýblıkasynda nemese Almaty oblysy, Almaty qalasynda barlyq otbasy músheleriniń turǵyn úıiniń bolýy/bolmaýy týraly anyqtamalar; balalardyń týý, neke nemese ajyrasý týraly kýálikterin skanerleý; eńbek kitapshasynyń kóshirmesi; jumys ornynan anyqtama nemese zeınetaqy jarnalary týraly úzindi kóshirmesin usynbaǵan»,- dep habarlady ákimdikten.

Sonymen qatar, 3 845 ótinish jumys orny baǵdarlama talaptaryna sáıkes kelmegendikten, basymdyqqa jatpady.

Sondaı-aq, ákimdik ótinishter qalaı qaralǵanyn aıtty.

«Basqarma qujattardy qabyldaý aıaqtalǵannan keıin barlyq berilgen ótinish pen qujatty júkteý jumystaryn júzege asyrady, sodan keıin barlyq qujattyń baǵdarlama talaptaryna sáıkestigi qolmen tekseriledi. Tizimge engizý kezegi jınaǵan ball sanymen, ıaǵnı sanat boıynsha eń kóp ball sanymen anyqtalady. Saıtta ornalastyrylǵan, biraq qabyldanbaǵan ótinishter tizimi durys ári ózekti. Ornalastyrý kezinde tizim basqa sferalarǵa qosylyp ketken, biraq bul nátıjege áser etpeıdi. Baǵdarlamaǵa qatysýǵa ótinimderdi qatysýshylar saıtta ETsQ arqyly berdi, barlyq qujat júkteldi, osylaısha, basqarma qyzmetkerleriniń qujattardy joıý múmkindigi bolmady», dep túsindirdi qalalyq ákimdiktiń baspasóz qyzmeti.

Almaty qalasy ákimdigi qaralǵan ótinishterdiń nátıjesi negizdelgendikten, ótinishterdi qaıta qaraý júrgizilmeıtinin atap ótti.