«Almaty jastary» baǵdarlamasyna qatysýshylarǵa ekinshi múmkindik berildi

ALMATY. QazAqparat - Almaty qalasynyń ákimdigi «Almaty jastary» jeńildetilgen nesıe berý baǵdarlamasyna qatysýǵa bergen ótinimderdi qosymsha irikteıtinin málim etti, dep habarlaıdy QazAqparat tilshisi.

«Bul joly baǵdarlamaǵa bıyl negizgi baıqaýlyq irikteý kezeńinde (2022 jylǵy 18 mamyrdan 1 maýsymǵa deıin) ótinish bergen, biraq qujattyń durys toltyrylmaýyna/rásimdelmeýine/berilmeýine baılanysty ótpegen ótinish berýshiler ǵana baǵdarlamaǵa qatysa alady»,- dep habarlady ákimdikten.

Barlyǵy 1000 ótinim qarastyrylyp, tólem qabilettiligi boıynsha 863 nesıe maquldandy. Qalǵan 137 orynǵa buryn qujat tapsyrǵan 5225 qatysýshy úmitker bola alady.

2022 jyldyń 10-14 qazan aralyǵynda almaty-zhastary.kz saıty arqyly ótinimińizge ózgeris engizip, qujattardy tizimge sáıkes jańartýǵa bolady.

Aıta keteıik, baǵdarlamanyń bıýdjetine 18 mlrd teńge qarastyrylyp otyr. Al nesıeniń eń joǵary somasy – 18 mln teńgege deıin. Syıaqy mólsherlemesi – 5, bastapqy jarnasy – 10 paıyz. Qatysýshynyń jańa salynǵan nemese qoldanystaǵy turǵyn úı naryǵynan 45 kúntizbelik kún ishinde úı tańdaý múmkindigi bar.

Ótinish bere alatyn azamattar sanatyna Almatydaǵy memlekettik qalalyq jáne respýblıkalyq mekemede eńbek etetinder, dárigerler men meıirbıkeler, pedagogtar men tárbıeshiler, ártister, jazýshylar, mádenıet salasynyń mamandary, jattyqtyrýshylar men sportshylar, JOO oqytýshylar men ǵylymı qyzmetkerler, áleýmettik sala mamandary: jýrnalıster men BAQ qyzmetkerleri (memlekettik jáne kommertsııalyq), óndiristik salada eńbek etetinder kiredi.

«Almaty jastary» baǵdarlamasyna qatysý úshin qalada turaqty tirkelý mindetti emes.