«Almaty jastary» baǵdarlamasymen beriletin nesıe 18 mlrd teńgege ósti

ALMATY. QazAqparat – Almatyda 2021 jyly «Almaty jastary» baǵdarlamasymen 1000 páter beriledi. Bul týraly búgin VII shaqyrylymdaǵy máslıhattyń birinshi sessııasynda qala ákimi Baqytjan Saǵyntaev aıtty, dep habarlaıdy QazAqparat tilshisi.

Ákimniń aıtýynsha, osy baǵytta ákimdik «Otbasy bank» AQ talqylaý jasap jatyr.

«Byltyr bankpen birige otyryp 13 mlrd teńge bóldik. Búginde qalamyzdyń ekonomıkasynyń ár salasynda eńbek etip jatqan 1000-ǵa jýyq jas osy baǵdarlamamen páter aldy. Bıyl da osyny jalǵastyramyz. Inflıatsııaǵa baılanysty naryqta páter qymbattap barady. Soǵan baılanysty nesıe kólemin 18 mlrd teńgege jetkizip jatyrmyz. Bıyl da 1000 páter beriledi. Bul «Nurly jer», «Baqytty otbasy» baǵdarlamalarynan bólek bolmaq», - dedi ákim.

Onyń aldynda ákim 25 JOO bazasynda 16 myń orynǵa 38 jataqhana, eki kolledjde 600 oryndyq jataqhana salynatynyn aıtqan bolatyn.

Jalǵa alý baǵdarlamasymen Almatyda jumysker jastar 5 myń páter alatyn bolady.

Aıta ketý kerek, Almatyda búgin VII qalalyq Máslıhattyń birinshi sessııasy ótti.

Sessııa barysynda Máslıhat hatshysy, qaıtadan qurylǵan turaqty komıssııa tóraǵalary taǵaıyndaldy. Sonymen qatar, «Almaty-2025» damý baǵdalamasy bekitildi.