«Almaty jastary» baǵdarlamasy: Bıyl 900-ge jýyq páter beriledi

NUR-SULTAN. QazAqparat – Jyl sońyna deıin Almaty qalasynda 2 mln 604 myń sharshy metr baspanany qoldanysqa berý josparlanǵan. Bul týral qala ákimi Baqytjan Saǵyntaev aıtty, dep habarlaıdy QazAqparat tilshisi.

«Jyl sońyna deıin biz 2 mıllıon 604 myń sharshy metrden astam turǵyn úıdi paıdalanýǵa berýdi josparlap otyrmyz. Onyń ishinde memlekettik bıýdjet esebinen – 248,5 myń sharshy metr nemese 3266 páter úlestirilmek. Bıyl «Nurly jer» baǵdarlamasy sheńberinde 800-den astam almatylyqty baspanamen qamtamasyz etýge múmkindik bergen «Shańyraq» pılottyq jobasy iske qosyldy», - dedi qala ákimi.

Shahar basshysy «Almaty jastary» baǵdarlamasy boıynsha jyl sońyna deıin taǵy 884 páter beriletinin málim etti.

«2020 jyldan bastap «Almaty jastary» baǵdarlamasy boıynsha jyl saıyn 1 myń jas qamtylady. Búginde turǵyn úıdi bólý tásilderi qaıta qaraldy. Jyl basynan beri 116 jas otbasy baspanaly boldy», - dedi ákim.