«Almaty jastary» baǵdarlamasy aıasynda beriletin páterdiń sany artady

ALMATY. QazAqparat - Bıyl «Almaty jastary» baǵdarlamasy boıynsha 1100 páter beriledi. Bul týraly óńirlik kommýnıkatsııalar qyzmetinde ótken baspasóz máslıhatynda «Otbasy bank» AQ Almaty fılıalynyń dırektory Danagúl Túsipova málim etti, dep habarlaıdy QazAqparat tilshisi.

«2017 jyldan bastap qalamyzda «Almaty jastary» jeńildetilgen baǵdarlamasy júzege asyp jatyr. Ol barlyq óńirlerde aımaqtyq baǵdarlamalardyń iske qosylýyna negiz boldy. «Elorda jastary», «Alataý jastary» baǵdarlamalary bar. Munda ár aımaqta nesıe berý sharttary ártúrli. Máselen, «Almaty jastary» baǵdarlamasy aıasynda bilim, densaýlyq saqtaý, mádenıet, BAQ, sport, ǵylymı-zertteý ınstıtýttary, quqyq qorǵaý organdary sııaqty jeti salada eńbek etip júrgen 35 jasqa deıingi jastarǵa nesıe beriledi»,- dedi spıker.

Danagúl Túsipovanyń aıtýynsha, bıyl baǵdarlamaǵa ózgerister engizilmek.

«Qazir ákimdiktiń maquldaýyn kútip otyrmyz. Baǵdarlamanyń bastalǵanyn keıin habarlaımyz. Biz 1100 azamatqa nesıe berýdi josparlap otyrmyz. Baǵdarlama sharttaryna kelsek, bastapqy jarna – 10 paıyz, mólsherleme – 5 paıyz, nesıe somasy byltyrǵydaı 18 mln teńge bolýy múmkin», – dep túsindirdi spıker.

Eske salaıyq, 2022 jyly «Almaty jastary» turǵyn úı baǵdarlamasy aıasynda myń adamǵa ıpotekalyq nesıe berý úshin 18 mlrd teńge bólingen bolatyn.

Aıta keteıik, «Almaty jastary» baǵdarlamasyna qatysý úshin qalada turaqty tirkelý mindetti emes.