«Almaty jastary 3.0» turǵyn úı baǵdarlamasy aıasynda 105 polıtseı baspanaly boldy
ALMATY. QazAqparat - Almatynyń 100-den astam polıtseıi «Almaty jastary 3.0» baǵdarlamasy boıynsha páter ıesi atandy, dep habarlaıdy QazAqparat tilshisi.
Almaty qalasy ákimdiginiń qoldaýymen «Almaty jastary 3.0» turǵyn úı baǵdarlamasyna qatysý úshin adamdar sanattarynyń tizimine 35 jasqa deıingi polıtsııa qyzmetkerleri de engen.
«Qazirgi tańda PD qyzmetteri men bólimsheleriniń qyzmetkerleri «Almaty jastary 3.0» turǵyn úı baǵdarlamasyna qatysýǵa 707 ótinish berdi. 587 ótinish berýshi bankke tólem qabilettiligin rastaý úshin joldama aldy. Jalpy, osy kezeńde atalǵan baǵdarlama boıynsha 105 polıtsııa qyzmetkeri páterge ıe boldy. Osy turǵyn úı baǵdarlamasy boıynsha memlekettik qyzmetkerlerge 1 myń turǵyn úı nesıesi bólindi, onyń 170-i polıtsııa qyzmetkerlerine», – dedi Almaty qalalyq polıtsııa departamenti bastyǵynyń orynbasary Ábdýálı Nasharbekov.
Sonymen qatar, ol polıtsııada 2021 jylǵy 1 sáýirde «Qazaqstan Respýblıkasynyń keıbir zańnamalyq aktilerine ónerkásiptik qaýipsizdik, ónerkásip aımaqtary, janýarlar dúnıesi, erekshe qorǵalatyn tabıǵı aýmaqtar, energetıka, tabıǵı monopolııalar jáne ishki ister organynyń qyzmetkerlerine turǵyn úı tólemderi máseleleri boıynsha ózgerister men tolyqtyrýlar engizý týraly» Zańynyń kúshine engenin atap ótti.
Zań polıtsııa qyzmetkerlerin turǵyn úımen qamtamasyz etýdiń jańa júıesine kóshýdi jáne aı saıynǵy turǵyn úı tólemderin júzege asyrýdy kózdeıdi. Qyzmetkerlerdiń turǵyn úı tólemderin paıdalaný arqyly turǵyn úı menshigine ıe bolý quqyǵy bir ret júzege asyrylady. Turǵyn úı járdemaqylary maqsatty jumsalady.
«Qazaqstan Respýblıkasy Úkimetiniń 05.08.2021 jylǵy №524 qaýlysy negizinde turǵyn úı tólemderin alýǵa úmitker Almaty qalasy PD qyzmetkeri men «Otbasy banki» AQ arasynda úsh jaqty kelisim shart jasalynady. Sodan keıin arnaıy shot ashylady. Daıyndyq naýqany barysynda atalǵan bank ókilderi jeke qurammen túsindirý jumystaryn júrgizdi. Qadamdyq algorıtmdi ázirleı otyryp, qarjy sektorynyń keńesshileri qujattardy jınaý tártibin ońaılatty jáne bizdiń qyzmetkerlermen turaqty túrde tyǵyz baılanysta boldy, bul úshin olarǵa erekshe alǵys bildiremin», – dedi polıtsııa ókili.
