Almaty jasóspirimderi «Jetkinshek kúni» aıasynda alǵash ret áleýmettik mańyzy bar mamandyq túrlerimen tanysty
ALMATY. 8 tamyz. QazAqparat /Názıra Eleýhan/ - Almatyda "Bolashaqta kim bolatynymdy ózim sheshemin!" atty uranymen "Jetkinshek-2011" sharasy ótip jatyr.
Qala ákimdiginiń jáne Nestle kompanııasynyń uıymdastyrýymen bastalǵan aktsııaǵa qala jastary men jasóspirim jetkinshekter arnaıy shaqyrylǵan.
"Bul shara osymen ekinshi ret ótkizilip otyr. Alǵashqy aktsııamyzdy salaýatty ómir saltyn nasıhattaýǵa arnasaq, bıyl biz jetkinshekterimizdi kásibı baǵytqa eliktirý sekildi mańyzdy máselelerdiń birin kóterip otyrmyz. 13-ten asa mamandyq túrleriniń ókildikteri tartyldy. Búgin munda kelgen ár bala órt sóndirýshi, polıtsııa qyzmetkeri, muǵalim, jýrnalıst, jedel-járdem dárigeri, qutqarýshy, meteorolog, qoǵamdyq kólik júrgizýshisi, aspazshy syndy áleýmettik mańyzy bar mamandyqtardyń jumystarymen tanysyp, sol qyzmettegi kásibı mamandardan sheberlik dárister ala alady jáne alańǵa qoıylǵan tehnıka túrlerin - avtobýs, órt sóndirý, jedel-járdem kólikterin kórip tamashalaı alady. Búgin alǵash ret almatylyq jetkinshekter úshin ár túrli mamandyqty shynaıy túrde synap kórý múmkindigi týyp otyr", -deıdi Almaty qalasy ákimdiginiń Jastar saıasaty basqarmasynyń bastyǵy Bahtııar Maken. Onyń aıtýynsha, sharanyń negizgi maqsaty - jetkinshekterge jol silteý, ár zamanda qajetti bolyp tabylatyn áleýmettik mańyzy bar mamandyqtardy nasıhattaýǵa úles qosý bolyp tabylady.
Aktsııaǵa tótenshe jaǵdaılar qyzmeti de qatysýda. "Biz "Jetkinshek kúninen" qutqarýshylar bedeliniń artýyn kútemiz. Eger tipti bir jetkinshek bizdiń kásibimizge qyzyǵatyn bolsa, onda osynyń bárin bekerge jasamaǵan bolamyz",-dedi Tótenshe jaǵdaılar basqarmasy bastyǵynyń orynbasary Pavel Myskın.
Ótken jyly alǵash ret uıymdastyrylǵan "Jetkinshek kúnine" 5 000 bala qatyssa, bıyl uıymdastyrýshylar 10 000-ǵa jýyq jetkinshekter tartylady dep kútýde.
