Almaty: Jas natýralıster oranjereıasynda 250 ósimdik túri úsip ketti
ALMATY. QazAqparat - Almatyda jas natýralıster stansasynda tutas bir oranjereıanyń 250 ósimdigin úsik shaldy, dep habarlaıdy QazAqparat tilshisi.
Anyqtalǵandaı, jylý qubyrynyń jarylýynan stansa jylýsyz qalǵan. Flora men faýnanyń múshkil jaǵdaıy týraly qoǵam belsendileri men tabıǵatty qorǵaýshylar dabyl qaqty.
«Taýgúl shaǵyn aýdanynda qubyrdyń jarylýynan Jas natýralıster stansasy da japa shegip jatyr. Oranjereıadaǵy ósimdikterdiń barlyǵy qatyp qaldy. Keıbirin ǵımaratqa tasyp úlgerdi. Ǵımaratta da jylý bolmaǵandyqtan, olardyń onda da úsip qalý qaýpi bar. Sonymen qatar barlyq balyqtar men ekzotıkalyq qustardy da úsik shalýy múmkin», - dedi Svetlana Spatar Feısbýktegi paraqshasynda.
Atalǵan stansanyń dırektory Zeınep Arıshevanyń aıtýynsha, qazir ǵımaratqa birtindep jylý berilýde.
«Qazir qalanyń barlyq kommýnaldyq qyzmetteri bizge kómektesip jatyr. Arnaıy jylytý quraldaryn berdi. Jylý qubyry jóndelýde. Biraq 250 túrli ósimdikten turatyn oranjereıany saqtap qalý múmkin bolmady», - dedi Zeınep Arısheva.
Aıta ketý kerek, Pıatnıtskıı men Súleımenov kósheleriniń qıylysyna jaqyn ornalasqan aýmaqta dıametri 500 mm bolatyn qubyr jarylǵan bolatyn. Osyǵan baılanysty 1300 nysan jylytý júıesinen ajyratyldy.
Atap aıtqanda, Novaı, Jandosov, Beregovoı, Rysqulbekov kósheleri aýmaǵynda ornalasqan kópqabatty úıler men mekemeler jylýsyz qalyp, atalǵan aýmaqtaǵy mektep pen balabaqsha jumystaryn ýaqytsha toqtatty.
Qubyrdaǵy apatty kommýnaldyq qyzmet ókilderi túnimen qalpyna keltirýge tyrysty.
Tańerteńgi 11 shamasynda nysandarǵa birtindep jylý berile bastady.
