Almaty jáne Jetisý oblystary aýrýhanalaryna 14 mln teńge aıyppul salyndy

TALDYQORǴAN.QazAqparat - Medıtsınalyq qaldyqtarǵa qoıylatyn sanıtarııalyq-epıdemıologııalyq talaptardy buzǵany úshin Almaty jáne Jetisý oblystarynyń densaýlyq saqtaý obektilerine 14 mln teńgege aıyppul salyndy, dep habarlaıdy QazAqparat tilshisi.

«Almaty oblysynyń sanıtarııalyq qyzmeti densaýlyq saqtaý obektilerinde qaldyqtardy jınaýǵa, zalalsyzdandyrýǵa jáne saqtaýǵa qoıylatyn sanıtarııalyq-epıdemıologııalyq talaptardyń buzylýyna baılanysty jalpy somasy 14 mln teńgege 74 aıyppul saldy. Onyń ishinde medıtsınalyq qaldyqtardy jınaý, saqtaý jáne esepke alý merzimderi boıynsha zań buzǵan jeke tulǵalarǵa 69 aıyppul, laýazymdy tulǵalarǵa 3 aıyppul jáne medıtsınalyq qaldyqtardy ýaqytsha saqtaý úı-jaıyn jaraqtandyrý jáne jabdyqtaý jónindegi normalardy saqtamaǵany úshin zańdy tulǵalarǵa 2 aıyppul salyndy»,- delingen Almaty oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlamasynda.

Vedomstvonyń aqparatyna sáıkes, medıtsınalyq qaldyqtardy jınaýǵa, zalalsyzdandyrýǵa jáne saqtaýǵa qoıylatyn sanıtarııalyq talaptardyń saqtalýy oblystyq SEBD turaqty nazarynda.

Búgingi tańda departamentiniń baqylaýynda 1793 medıtsınalyq uıym bar.

Medıtsınalyq uıymdardyń árbir qurylymdyq bólimshesinde medıtsınalyq qaldyqtarmen jumys isteý shemasy ázirlenip, medıtsınalyq qaldyqtardy jınaý jáne ýaqytsha saqtaý úshin jaýapty tulǵalar bekitilgen.

Medıtsınalyq qaldyqtar arnaıy bir ret qoldanylatyn polıetılen paketterge jáne qaqpaǵy tyǵyz jabylatyn ydystarǵa jınalady. Olar medıtsınalyq qaldyqtardyń klasyna baılanysty belgilenedi.

Bekitilgen kestege sáıkes mamandandyrylǵan uıymdarmen jasalǵan kelisimshart negizinde shyǵarylyp, joıylady.

Bul mekemelerde qaldyqtardy durys joıýǵa arnalǵan peshter men jabdyqtar bar.

Departamenttiń aýmaqtyq basqarmalarynyń baqylaýynda medıtsınalyq qaldyqtardy joıýmen aınalysatyn 14 uıym bar.

Onyń bireýi óńdeý qýaty saǵatyna 120 kılogramnan astam bolǵandyqtan epıdemııalyq mańyzy joǵary, qalǵan 13-i epıdemııalyq mańyzy bolmashy obektiler sanalady.

Jyl basynan beri medıtsınalyq qaldyqtardyń «A» synybynyń qaldyqtary – 5721, 906 tonna, «B» synybyndaǵy epıdemıologııalyq qaýipti qaldyqtar – 18620,075 tonna, «V» synybynyń epıdemıologııalyq asa qaýipti qaldyqtar – 3360,991 tonna, «G» synybyndaǵy toksıkologııalyq medıtsınalyq qaldyqtardan – 3616 dana shyǵaryldy.

Olar - bakterıtsıdtik, lıýmınestsentti, quramynda synap bar, jaryq dıodty shamdar, termometrler, gıgrometrler jáne rentgen plenkalary.