Almaty jáne Shyǵys Qazaqstandaǵy sý tasqynynda zardap shekken aımaqtaǵy túlekter UBT-da 50 baldan joǵary alsa rektorlyq granttar berilmek
ASTANA. Maýsymnyń 11-i. QazAqparat /Rýslan Ǵabbasov/ - Almaty jáne Shyǵys Qazaqstan oblystarynda sý tasqyny saldarynan zardap shekken aımaqtaǵy túlekterge UBT-ny bir jarym aı keıin tapsyrýǵa múmkindik berildi. Bul týraly búgin Astanada Ulttyq biryńǵaı testileýdiń qorytyndysyna baılanysty ótken baspasóz máslıhatynda Bilim jáne ǵylym mınıstri Janseıit Túımebaev aıtty,
dep habarlaıdy QazAqparat.
Almaty jáne Shyǵys Qazaqstan oblystarynda sý tasqyny saldarynan zardap shekken aımaqtaǵy túlekterdiń UBT-ǵa qatysýy máselesine toqtalǵan mınıstr, «Almaty oblysyndaǵy Qyzylaǵash pen Shyǵys Qazaqstan oblysy boıynsha ol aımaqtardaǵy mektep bitirýshilermen, sondaı-aq olardyń ata-analarymen kezdesý ótkizdim. Bıylǵy jyly olarǵa Ulttyq biryńǵaı testileýdi, ıaǵnı eger ózderi qalasa bir jarym aıǵa shegerip, shildeniń 19-y men 24-i aralyǵynda tapsyrýǵa bolady»,-dedi.
J. Túımebaevtyń sózine qaraǵanda, sondaı-aq olar 50-den joǵary ball alsa, alaıda grantqa ilikpegen jaǵdaıda rektor grantyn alýǵa múmkindik berilmek. «Al jaqsy ball jınasa, árıne memlekettik granttar taǵaıyndalatyn bolady»,-dedi mınıstr.
