Almaty jáne Semeı zooveterınarııalyq memlekettik ınstıtýttaryn qaıta ashý qajet - Q. Aıtahanov
ASTANA. 9 maýsym. QazAqparat /Qanat Mámetqazyuly/ - Almaty jáne Semeı zooveterınarııalyq memlekettik ınstıtýttaryn qaıta ashý qajet. Búgin QR Parlamenti Senatynyń jalpy otyrysynda elimizdegi aýyl sharýashylyǵy mamandarynyń máselesin kóterip, Úkimet basshysynyń atyna saýal joldaǵan senator Qýanysh Aıtahanov osylaı málim etti.
«Memleket basshysy N. Nazarbaev agroónerkásip keshenin ındýstrııaldy-ınnovatsııalyq damytý arqyly elimizde arzan da sapaly azyq túlik ónimderiniń molshylyǵyn jasaý, onyń eksporttyq áleýetin kóterý mindetterin qoıdy. Bul mindetterdi oryndaýda ınnovatsııalyq daıarlyǵy men tájirıbesi bar bilikti de bilimdi mal sharýashylyǵy mamandarynyń, mal dárigerleri men zootehnıkterdiń jetispeýshiligi qatty sezilýde. Soǵan qaramastan, sońǵy jyldary, elimizde atalǵan sala boıynsha mamandar daıarlaý sany azaıyp, sapasy tómendep otyr», - dedi senator óz saýalynda. Onyń aıtýynsha, qazirgi tańda atalmysh mamandyqtar boıynsha oqýǵa túsýge ynta bildirgen jastardyń sany jyldan jylǵa azaıýda. Onyń sebepterine toqtalǵan depýtat, veterınarııa salasy mamandarynyń jumysy aýyr ári óte qaýipti bolýyna qaramastan olardyń qyzmet normatıvi bekitilmegenin, eńbek aqylarynyń tómendigin alǵa tartty. Aýyldyq jerlerde jumys isteıtin áleýmettik sala qyzmetkerlerine beriletin jeńildikter da osy sanatqa berilmeıdi. Budan bólek, senator mamandardyń aýyldyq jerlerde tolyqqandy jumys isteýine jaǵdaı jasalmaýy saldarynan, oqý bitirgen stýdentterdiń tórtten biri ǵana óz mamandyqtary boıynsha jumys istep júrgenin alǵa tartady.
«Elimizdiń 7 066 aýyldyq eldi mekenderiniń 3 094-inde nemese 44 paıyzynda veterınar mamandar joq. Al, joǵarǵy oqý oryndarynda aýyl sharýashylyǵy mamandaryn daıyndaý sapasynyń tómen bolýy, materıaldy-tehnıkalyq bazalarynyń nasharlaýy bilikti kadrlar men oqytýshylardyń azaıýyna ákelip soǵýda. Sondyqtan, aýyl sharýashylyǵy mamandaryn daıarlaýdyń sany men sapasyn arttyrý, olardy áleýmettik qoldaý maqsatynda birqatar máseleler sheshim tapsa ıgi. Atap aıtqanda, aýyl sharýashylyǵy salasynda jas mamandardyń aýylda turaqtandyrý úshin, olardy áleýmettik qoldaý sharalaryn iske asyrý qajet. Ekinshiden, mal dárigeri jáne zootehnık mamandaryn daıyndaý boıynsha memlekettik granttardyń kólemin ulǵaıtqan lázim. Sonymen qatar, Qazaqstan Respýblıkasy joǵary jáne joǵary oqý ornynan keıingi bilim berý mamandyqtarynyń jikteýishine «Zootehnııa» mamandyǵyn qalpyna keltirý qajet. Sebebi, zootehnık mal tuqymyn asyldandyrý men selektsııa júrgizýde, aýyl sharýashylyǵy maldarynyń ósimin molaıtý, mal azyǵyn, jemshóp óndirisi, mal sharýashylyǵy shıkizatyn óndirý jáne qaıta óńdeý, mal sharýashylyǵy qyzmetin uıymdastyrýdy jáne júrgizýdi qamtıtyn basty mamandyq bolyp esepteledi. Budan bólek, mal sharýashylyǵy salasyn bilikti de tájirıbeli mamandarmen qamtamasyz etý maqsatynda arnaıy mamandandyrylǵan Almaty jáne Semeı zooveterınarııalyq memlekettik ınstıtýttardy qaıta ashý qajet», - dedi senator.
