Almaty jáne Semeı qalalarynda ıadrolyq ortalyqtar ashylady

Bul týraly búgin elordadaǵy Respýblıkalyq dıagnostıkalyq ortalyqta ótken «Qazaqstandaǵy ıadrolyq medıtsına - qazirgi jaǵdaıy jáne perspektıvalyq damýy» atty respýblıkalyq konferentsııa barysynda QR Ulttyq ıadrolyq ortalyǵynyń bas dırektory Qaırat Kadyrjanov aıtty.

Onyń sózine qaraǵanda, Astanada tusaýy búgin kesilgen ortalyqtan eki ese úlken nysandy Semeı qalasynda salý jobalaný ústinde. Sondaı-aq Almaty qalasynda da ıadrolyq medıtsına jáne bıofızıka ortalyǵy qurylmaq. Atalǵan eki nysanda da Ulttyq ıadrolyq ortalyqtyń atom reaktorynyń múmkinshiligin paıdalaný boljanyp otyr. «Qurylǵanyna 50 jylǵa jýyqtaǵanymen biz ony is júzinde jańartamyz jáne taıaý eki-úsh jyldyń ishinde neıtron aǵyny 2 ese ulǵaıatyn bolady. Bizdiń kózqarasymyzsha, bul reaktordy jańartý arqyly farmatsevtıkalyq preparattar qurý problemasyn túbegeıli sheshemiz. 2011-2012 jyldarǵa qaraı biz fızıkterdiń jasaǵandarynyń arqasynda farmatsevtıkalyq preparattardy qoldanýdyń múmkindi 100 paıyzyn tolyǵymen paıdalanamyz», dedi ol óz sózinde.

Aıta keteıik, QR Ulttyq ıadrolyq ortalyǵy Memleket basshysynyń 1992 jylǵy mamyrdyń 15-indegi № 779 Jarlyǵymen burynǵy Semeı polıgonynyń áskerı-ónerkásip kesheniniń, sondaı-aq respýblıka aýmaǵynda ornalasqan tıisti ǵylymı uıymdar men nysandardyń negizinde quryldy. Ortalyq qyzmetiniń negizgi túrleri: Qazaqstan aýmaǵyndaǵy ıadrolyq qarý synaqtarynyń saldaryn joıý, Qazaqstanda atom energetıkasyn damytý úshin ǵylymı-tehnıkalyq, tehnologııalyq jáne kadrlar bazasyn qurý, burynǵy Semeı synaq polıgonynyń áskerı-ónerkásip keshenin konversııalaý jáne onyń ǵylymı-tehnıkalyq áleýetin Qazaqstan Respýblıkasynyń múddesine paıdalaný, álemniń qoldanystaǵy polıgondaryndaǵy ıadrolyq qarý synaqtaryn baqylaý.