Almaty zeınetkerleri jattyǵý zaly men basseınderge tegin qatysyp júr
ASTANA. QazAqparat - Almatyda qala ákimdiginiń qoldaýymen bıyldan bastap «Sporttyq Almaty», «Sport meniń aýlamda», «Batyl bol» syndy jobalardyń qataryna «Zeınetkerlerdiń belsendi uzaq ómir súrýi» baǵdarlamasy iske qosyldy, dep habarlaıdy qalalyq aqparattyq-sporttyq hab.
Bul tegin baǵdarlama 63 jastan asqan zeınetkerlerdiń arasynda salaýatty ómir saltyn ustanýǵa baǵyttalǵan. Qazir oǵan 800 adam tirkelip, kúndelikti jattyǵý ótkizýde. Olardyń teń jartysy basseınge, al 400 adam fıtnes-zaldarǵa jazylǵan.
Joba shilde aıynyń ortasynda bastalǵan bolatyn. Jattyǵýlar qalanyń «Akvastars», «Qazaqstan» saýyqtyrý sport kesheni, «N2O» syndy bes basseıni bar ortalyqtarynda jáne «Pıramıda», «Akvastars» sekildi bes fıtnes-zalynda ótkizilip jatyr.
- Baǵdarlama qatysýshylarynyń árqaısysy aptasyna úsh ret bir saǵattan jattyǵý ótkizýi qajet. Ol adamdy saýyqtyrý úshin jaqsy áser beredi. Tájirıbege súıensek, osy jastaǵy adamdar dene shynyqtyrýmen aınalyssa aǵzasynyń jumys isteýi men qan aınalymy jaqsaryp, qanttary azaıady. Sondaı-aq, holesterınderi azaıyp, býyn etteri aýyrmaıtyn bolady jáne osteohondrozdary ketedi, - deıdi osy áleýmettik jobanyń jetekshisi Erlan Adambekov.
Onyń aıtýynsha ár jattyǵý toptarynda bir kezekshi bapker bolady. Olar kómek qajet bolsa, zeınetkerlerge jattyǵýdy qalaı durys jasap, ne isteýge bolady jáne ne isteýge bolmaıtyndyǵyn aıtyp beredi.
Alaıda, ár adamǵa jeke bapker bolmasa jumys jasaý qıyndaý eken. Sebebi, qart adamdarǵa erekshe jáne jeke tásilder kerek. Eger kelesi jyly osy baǵdarlama jalǵasyn tabatyn bolsa, bul baǵytta jumys atqarylýy múmkin. Al, bıyl bul joba tek pılottyq rejımde júzege asyrylyp, jyldyń sońyna deıin jalǵasady.
Aıta keter jaıt, zeınetkerlerdiń arasynda jasy 80-nen asqan qarttar da belsendi ómir saltyn júrgizip, óz qatarlarynan qalyspaı keledi. Osy jobanyń qatysýshysy bolam degen kez kelgen zeınetker qajetti qujattar, ıaǵnı zeınetker kýáligi, tólqujatyn ótkizip, kelesi nómirler boıynsha uıymdastyrýshylarǵa habarlasýy tıis: 8-701-761-07-63, 8-727-295-25-50.
