Almaty zerthanalyq qyzmetinen úlgi alýǵa bolady – QR Densaýlyq saqtaý vıtse-mınıstri
ALMATY. QazAqparat – Búgin brıfıng barysynda QR Densaýlyq saqtaý vıtse-mınıstri Qamaljan Nadyrov megapolıstegi zerthanalar jumysynyń nátıjeligin atap ótti, dep habarlaıdy QazAqparat tilshisi.
Eldegi tótenshe jaǵdaıǵa baılanysty Densaýlyq saqtaý mınıstri E. Birtanovtyń tapsyrmasy boıynsha búkil el aýmaǵynda monıtorıngtik toptar jumys isteıdi.
Monıtorıngtiń maqsaty – memlekettik bas sanıtarlyq dárigeri tapsyrmalarynyń medıtsınalyq uıymdarda oryndalýyn baǵalaý jáne baqylaý. Atap aıtqanda, COVID-19 qarsy kúres boıynsha aldyn alý sharalaryn saqtaýda qala ishindegi naýqastar legin bólý algorıtmi; medıtsınalyq uıym ishinde naýqastar legin bólý algorıtmi; jeke qorǵaný quraldaryn paıdalaný jáne ony joıý erejesi, sondaı-aq mańyzdy sharalardyń mindetti túrde oryndalýyn saqtaý.
«Búgingi tańda el aýmaǵynda 5-6 myńǵa jýyq test júrgiziledi. Osy oraıda Almaty qalasyndaǵy zerthanalyq qyzmettiń jumysyn erekshe atap ótkim keledi. Qazirgi tańda olardyń qyzmetin úlgi tutarlyq desek bolady. Almatyda myńǵa jýyq testter júrgiziledi. Bul – zerthananyń jumysyna jáne osy sharaǵa qatysatyn medıtsına qyzmetkerlerine aýyr júkteme», — dedi Q. Nadyrov.
