Almaty zańsyz oıyn bıznesiniń ortalyǵy bolyp otyr - Qarjy polıtsııasy
ASTANA. 19 sáýir. QazAqparat - Qarjy polıtsııasy organdarynyń statıstıkasy kórsetkenindeı, Almaty qalasy zańsyz oıyn bıznesiniń ortalyǵy bolyp qalyp otyr.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.
Resmı ókildiń aıtýynsha, 2010 jyldan bastap Almatyda 27 jasyryn kazıno jáne 150 zańsyz jumys istegen oıyn zaly avtomattary anyqtaldy. «2011 jyly Almaty qalasynda Ómirzaqov jáne Pahırdınovpen uıymdastyrylǵan 7 astyrtyn oıyn zaldarynyń qyzmeti áshkerelendi. Almaly jáne Áýezov aýdandarynda jumys istegen bul zańsyz mekemelerde 156 oıyn avtomaty, 7 elektrondyq rýletka jáne 3,5 mln. teńge alynǵan. Osy jeliniń qyzmetinen alynǵan zańsyz tabys 1,3 mlrd. teńgeni qurady. Buǵan qosa, 2010 jyly Ómirzaqov oıyn bıznesimen tabylǵan aqshaǵa Aqmola oblysy aýmaǵynan jer telimin satyp alǵan», - deıdi M. Jumanbaı. Onyń aıtýynsha, sot úkimimen Ómirzaqov jáne Pahırdınov zańsyz kásipkerlikpen aınalysqanyna jáne zańsyz jolmen tabylǵan aqsha qarajatyn zańdastyrý boıynsha kináli dep tanylyp, árbireýine 1 mln. 200 myń teńge somasynda aıyppul tóleýge úkim shyǵarylǵan.
